Medio Rural traspasa parcelas do banco de terras a Cuntis, Cerdedo-Cotobade, Cambados, Ribadumia e Vilanova
Por Redacción
A Consellería do Medio Rural comezou hai uns días os contactos para levar a cabo a última quenda do traspaso de parcelas do Banco de Terras a concellos de toda Galicia. O director xeral da Axencia Galega de Desenvolvemento Rural, Miguel Pérez Dubois, mantivo este venres un encontro cos concellos da provincia de Pontevedra.
Na reunión, á que asistiu tamén o delegado provincial José Manuel Cores Tourís, indicóuselles aos municipios beneficiarios deste traspaso os predios que son susceptibles de recibir e o proceso a seguir a continuación.
En concreto, Medio Rural traspasará 84 terreos sen utilidade agraria aos concellos de Cuntis, Cerdedo-Cotobade, Cambados, Ribadumia, Vilanova de Arousa e Tomiño. Falamos de predios que non valen para arrendar, que é o obxectivo último do Banco de Terras, pero si poden ter un uso veciñal ou municipal.
Estes terreos poderá pasar a ser dos concellos grazas á Lei de mellora da estrutura territorial agraria de Galicia (Metaga), que permite que este tipo de parcelas pasen a ser directamente do municipio dun xeito máis áxil e con menos carga burocrática que a tradicional cesión que se viña realizando ata o de agora.