Xa se pode solicitar praza no centro de día para menores do Príncipe Felipe
A Deputación de Pontevedra abre esta semana o prazo no cal se poderán cubrir as 106 prazas do centro de día do Príncipe Felipe.
A deputada delegada do centro, Eva Vilaverde, explica que este centro está destinado a menores de entre catro meses e 16 anos cuxas familias se atopen con dificultades para facerse cargo deles durante a xornada laboral, de modo que as necesidades dos menores queden cubertas.
As bases reguladoras sairán esta semana no Boletín Oficial da Provincia (BOPPO), e as solicitudes poderán presentarse durante 30 días.
Os requirimentos xerais son ter cumplidos os catro meses e ter menos de 16 anos no momento do ingreso, estar empadroado en concellos da provincia de Pontevedra e pertencer a familias con dificultades de carácter económico-social.
Os menores en risco de desamparo ou con dificultades específicas non serán aceptados, xa que necesitan atención en centros especializados.
Os nenos que se beneficien do centro de día do Príncipe Felipe gozarán da correspondente manutención, cobertura alimenticia e hixiénica, recursos de carácter psicoeducativo e instalacións convenientemente dispostas.
Os horarios poderán ser elixidos polas familias según máis lles conveña, en función das súas necesidades, pero tendo en conta que non poderán pasar no centro máis de oito horas diarias.
O número de prazas ofertadas é de 72 para o centro infantil, 17 para o centro Escola Fogar e outras 17 para o Centro Agarimo.