Protesta canina en Portocelo pola ameaza de multas
Por Anxo Lourido
Un grupo dunha ducia de propietarios de cans de Marín decidiron concentrarse esta mañá ante a baixada da praia de Portocelo. Están indignados ante o anuncio da concellería de Medio que lles recordou recentemente que está prohibido levar cans aos areais do concello marinense tanto na época estival como durante o resto do ano baixo a ameaza de que poden ser sancionados con multas de ata 750 euros.
Esta situación provocou un movemento de protesta nas redes sociais ao que se sumaron colectivos como a Protectora Os Palleiros e o Refuxio de Animais de Cambados. A primeira medida adoptada era a de concentrarse esta mañá na praia de Portocelo coa intención de que nun programa da Televisión de Galicia recollese a protesta. E así foi. Unha ducia de propietarios achegouse ata alí ás dez da mañá pero o equipo da TVG non acudiu á cita. Os que acudiron foron unha parella de axentes da policía local que recordou aos manifestantes que se baixaban ao areal poderían ser multados. Entregaron a copia dunha folla do boletín oficial da provincia na que se establece a normativa sobre a presenza de animais en espazos públicos.
Unha vez marcharon os axentes, os donos dos cans decidiron levar a cabo unha protesta contra esta medida durante un dos fins de semana do mes de maio nunha data que aínda terán que determinar. Reclaman, como mínimo, unha zona habilitada na praia para os animais de compañía.