Nace Mar das Illas, un proxecto que promove o turismo mariñeiro nas Rías Baixas
Por Redacción
Os grupos de acción local do sector pesqueiro (GALP) de Vigo, Pontevedra e Arousa acaban de poñer en marcha o proxecto Mar das Illas, que fomenta o emprendemento entre os colectivos mariñeiros locais como alternativa de negocio e permitirá vender experiencias mariñeiras, ensinar o patrimonio e cultura e reforzar a oferta turística das Rías Baixas.
A conselleira do Mar, Rosa Quintana, participou este venres na inauguración do proxecto en Vigo, pero trátase dunha iniciativa posta en marcha polos grupos de acción local do sector pesqueiro de Vigo, Pontevedra e Arousa, de modo que a responsable política eloxiou o traballo feito polos tres GALPs das Rías Baixas.
O principal obxectivo do proxecto consiste en promover a actividade do turismo mariñeiro entre os profesionais do mar e seus familiares nas Rías Baixas, especialmente no ámbito do Parque Nacional Marítimo Terrestre das Illas Atlánticas.
Esta promoción realizarase a través do desenvolvemento de actividades e formación como intérpretes do patrimonio marítimo‐costeiro, facendo especial fincapé no Parque Nacional.
Rosa Quintana sinalou que o proxecto aposta polo turismo mariñeiro como un novo modelo de negocio para o sector, "que atende con mimo a sustentabilidade, o coidado do medio ambiente e a valorización da nosa cultura e tradición".
Durante a presentación do proxecto, a conselleira deu a coñecer que a Xunta recibiu este ano case 200 solicitudes para desenvolver proxectos de dinamización e creación de emprego nas áreas costeiras de Galicia. Para a posta en marcha deste tipo de proxectos, o seu departamento puxo a disposición do sector 11 millóns de euros.
Estas achegas, dixo a conselleira, concédense co propósito de xerar emprego mediante a cohesión territorial, a inclusión social e a mobilidade laboral nas comunidades costeiras.
Relacionadas:
-
Os guías acreditados do Parque Nacional das Illas Atlánticas piden protección fronte o intrusismo
Por Oskar Viéitez |
-
Europa financia unha escola de mergullo e equipamento para a recollida de refugallos de buques
Por Oskar Viéitez |
-
Tres proxectos do GALP Ría de Pontevedra entre os finalistas aos premios Economía Azul
Por Redacción |
-
O GALP Ría de Pontevedra presenta en Bueu o seu programa de axudas
Por Redacción |