Pontevedra renova a súa devoción cara San Benitiño de Lérez
Por Redacción & Diego Torrado
Centos de fieis renovaron este mércores a súa devoción cara San Benitiño que, segundo a tradición relixiosa, é o santo máis "milagreiro" da comarca de Pontevedra.
Todos eles cumpriron co ritual e, como cada 11 de xullo, acudiron ás inmediacións do mosteiro de Lérez para rogarlle ao santo a curación dos seus males, sobre todo os relacionados coa pel.
Desde primeira hora da mañá, os fieis achegáronse ata o santuario para, como mandan os canons pasar tres veces por baixo do altar e levar o aceite para a cura das verrugas, ademais de deixarlle billetes á figura do santo.
A misa principal desenvolveuse ás 13.00 horas e tras a súa finalización celebrouse a tradicional procesión polos arredores do mosteiro.
Ao longo de todo o día, repetíronse as colas para facerse cun pouco de aceite bendito para curar verrugas ou outras afeccións da pel.
No exterior do templo, mentres tanto, un importante número de persoas probaban o polbo, churrasco ou as rosquillas propias desta cita co San Benitiño estival.