Tráfico denuncia 376 condutores bébedos e 265 drogados en xullo en Pontevedra
Por Redacción
O subsector de Tráfico da Garda Civil de Pontevedra detectou durante o mes de xullo a 376 condutores que circulaban polas rúas da provincia dando positivo en consumo de alcol e 265 en drogas.
Segundo os datos facilitados pola Garda Civil, durante o pasado mes realizaron un total de 21.777 probas de alcol e droga na rede viaria da provincia de Pontevedra.
En concreto, 21.308 foron probas de alcoholemia e detectáronse 376 condutores que deron resultado positivo. A maior parte deles, 358 foron detectados en controis preventivos, 10 foron con motivo de sufrir un accidente de circulación e oito con ocasión de infraccións á Lei de Seguridade Viaria.
Por idades, a porcentaxe máis alta de probas positivas de alcoholemias correspóndese co grupo de condutores comprendido entre os 18 e os 34 anos. Por sexo, o 85% dos condutores denunciados neste período de tempo son homes.
Ademais, realizaron 469 probas de drogas, das que 265 deron resultado positivo. A 222 condutores detectáronos nos controis preventivos, a 27 con ocasión de infraccións e a 16 con motivo de sufrir un accidente de circulación.
Como dato rechamante, desde a Garda Civil destacan que detectaron a dous condutores que deron positivo en tres drogas distintas.