Dous millóns de euros para darlle "calidez" a Loureiro Crespo e humanizar os seus espazos públicos
Por Alejandro Espiño
É a quenda de Loureiro Crespo. O goberno municipal acometerá en 2019 a reforma integral desta rúa, unha das principais vías de entrada á cidade de Pontevedra. Non será un proxecto menor, xa que o investimento rozará os dous millóns de euros.
Trátase dun proxecto "extraordinario". Así o cualificou o concelleiro de Obras, Demetrio Gómez, que explicou que está deseñado para dar "calidez" e calidade urbana a un barrio "duro", construído nos anos 60 e 80 "sen respecto algún" polo espazo público.
Esta zona da cidade, sinalou o edil, necesitaba "moito traballo nela". Por iso é polo que o estudo de arquitectura que redactou o proxecto, Rodríguez e Rivoira, tivesen que planificar este espazo de maneira integral.
A reforma, que se presentou este venres, aplicará en todo Loureiro Crespo os estándares urbanos que hai en toda Pontevedra, dando preferencia ao tránsito peonil, reforzando a seguridade viaria e apostando por unha maior convivencia nos espazos públicos dun barrio cunha "alta densidade" de poboación e con moita actividade comercial.
Ademais, tívose en conta que ambos os extremos -o inicio da Avenida de Lugo e a nova Praza do Hospital- xa están reformados e, por tanto, había que buscar unha solución de continuidade; e que a rúa debía quedar adaptada para o paso dos tradicionais desfiles de Reis Magos ou os entroidos.
Demetrio Gómez destacou que o proxecto "resolve moi ben" as zonas de transición e dá un "salto moi importante" nas solucións adaptadas para reforzar o carácter peonil, cun tratamento "magnífico" tanto nos materiais que se empregarán como no arboledo, con máis de 90 exemplares, que se plantarán en toda a rúa.
UN ÚNICO CARRIL DE CIRCULACIÓN
Loureiro Crespo, tras esta reforma, contará con beirarrúas de entre 4 e 7 metros, que estarán construídas en baldosa e cos bordos en granito, o que obrigará a reducir a circulación a un único carril, de 3.15 metros de ancho, que terá sentido de entrada á cidade desde a Avenida de Lugo.
Eliminaranse todos os aparcadoiros da marxe esquerda e, no lado dereito, pasarán a estar reservados para servizos. Ademais, renovarase toda a iluminación, o mobiliario urbano e as redes de abastecemento, saneamento, pluviais ou electricidade.
Esta reforma incluirá, doutra banda, unha solución inédita en Pontevedra. Para non interromper o tránsito peonil, as beirarrúas terán continuidade nos cruzamentos coas rúas perpendiculares e non quedarán interrompidas pola calzada.
Ademais, cada tramo terá un tratamento gradual e lixeiramente diferenciado do anterior. Así, ata a rotonda do 12 de novembro, plantaranse os mesmos árbores que na Avenida de Lugo; mentres que esta rotonda estará presidida por dous grandes exemplares de liquidámbar, marcando a "porta de entrada" ao seguinte tramo urbano.
No cruzamento con Casimiro Gómez, rúa que tamén pasará a ter un só carril de circulación -neste caso de baixada cara Fernando Olmedo e A Seca-, crearase un espazo en granito que contará con outros tres árbores, neste caso bidueiros.
A reforma complétase co tramo ata a Praza do Hospital e, nese ámbito, a beirarrúa da marxe dereita replicará o aspecto desta praza, con laxa vulcano, mantendo a parada de taxis na zona e plantando árbores tipo quercus, cunha tonalidade similar aos que se poñerán en toda a rúa.
Toda esta combinación de solucións permitirá, destaca o goberno municipal, que Loureiro Crespo convértase nun espazo "completamente distinto" ao resto da cidade e teña unha " personalidade propia".
O proxecto está redactado pero, segundo Demetrio Gómez, "non está pechado". Nos próximos días entregarase aos grupos da oposición e, o día 19, manterase unha reunión coas asociacións de veciños da Parda e Travesía da Eiriña.
Tamén se convocará aos comerciantes, aos taxistas e realizarase unha asemblea aberta a todos os veciños para que poidan realizar suxestións. Todo iso para que, antes de final de ano, haxa unha proposta definitiva para que a obra poida saír a contratación.
Relacionadas:
-
Reapertura do parque da Palmeira, adicado a Daría González
Por Alba Feijoo Alonso |
-
Estudan incluír catro rúas máis na reforma urbana de Loureiro Crespo
Por Alejandro Espiño |
-
A reforma urbana chegará á rúa Rouco a principios de 2019
Por Alejandro Espiño |
-
Pedaladas advirte de que a reforma de Loureiro Crespo empeora a mobilidade en bicicleta
Por Redacción |
-
Benito Corbal estará completamente reformada nun prazo de catro meses
Por Alejandro Espiño |