CC.OO. critica que Sanxenxo malgaste fondos públicos en instalar cámaras de seguridade na sede da Policía Local
Por Redacción
O sindicato Comisións Obreiras denunciou este xoves que o Concello de Sanxenxo instalou un total de 15 cámaras de videovixilancia nas dependencias da Policía Local, un gasto que consideran innecesario e "irracional".
CC.OO. considera que esta decisión é irracional porque non está suxeita a ningunha necesidade obxectiva "a non ser o interese desmedido de control por parte do xefe da Policía Local de Sanxenxo" e critica que supón un gasto "absolutamente caprichoso e innecesario".
Desde o sindicato estiman que os cartos públicos "non están para satisfacer os caprichos persoais de ninguén" e sinalan que este "gasto inútil" contrasta coa negativa do goberno municipal de PP e SAL de resolver situacións "verdadeiramente sangrantes e discriminatorias" que se dan nas retribucións dunha parte importante do persoal do Concello de Sanxenxo.
Así, indican que hai traballadores que non teñen complemento especifico, as retribucións complementarias percíbense sen criterios obxectivos, ao persoal con contrato a tempo parcial dáselle menos salario do que realmente lles corresponde e non existe decisión firme de iniciar a negociación e posterior aplicación da Relación de Postos de Traballo (RPT), que debe corrixir as irregularidades retributivas que existen entre o persoal.
Á vista desta situación, CC.OO. esixe ao goberno municipal que utilice os recursos públicos de xeito racional, que adopte a decisión de cumprir coa lei e que se poña a negociar a Relación de Postos de Traballo, xa que ten esa esixencia por imperativo legal.
Desde CC.OO. critican que ningunha outra dependencia municipal ten instaladas cámaras de videovixilancia. Así, a Casa Consistorial, o centro Emilia Pardo Bazán, Protección Civil, o edificio de usos múltiples, a sede dos servizos sociais, a piscina municipal ou os servizos de obras e xardíns carecen deste servizo.