A CIG entrega sinaturas para que se manteña o dereito á xubilación parcial aos 61 anos
![](/web/cache/scene/uploads/fotos/foto/1ec/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/5bffcd15ef-20181129-patxot-reforma-pensiones-ciga-049.jpg)
© Mónica Patxot
![](/web/cache/scene/uploads/fotos/foto/664/_S7QytKoutjK3UsovKMnMzytWsi62MjK0UipKLc6sStUxMjDQSU_/_7NK0kt0inJL1CyrgUA_/5bffcda20d-20181129-patxot-reforma-pensiones-ciga-086.jpg)
© Mónica Patxot
Marcos Conde, secretario comarcal da CIG en Pontevedra, entregaba este xoves 3.500 firmas no rexistro da Subdelegación do Goberno para solicitar ao Goberno de Pedro Sánchez a derrogación da reforma das pensións.
O acto realizouse antes do Consello de Ministros deste venres co obxectivo de que o Goberno central reaccione e evite que se perda definitivamente o dereito á xubilación parcial aos 61 anos.
A reforma que se aprobou no ano 2011 eliminaba o dereito á xubilación parcial, fixando un período de transición que termina este 31 de decembro. Desde a CIG alertan que se non se dá marcha atrás, as clases medias e traballadoras seguirán perdendo dereitos. Unha situación que se agrava coa introdución do factor de sustentabilidade, o atraso da xubilación aos 67 anos ou o incremento do número de anos para o cobro da pensión completa.
"Non podemos permitir que deixen a clase traballadora atrás", afirmaba Marcos Conde ante a Subdelegación do Goberno. Sinala que decenas de miles de familias pontevedresas que conten cun integrante que cumpra 61 anos en 2019 veranse afectadas con esta medida.
A CIG xa presentou esta reivindicación ante o Ministerio de Traballo no mes de setembro e ao secretario de Estado da Seguridade Social. Anuncian que, se o goberno central non dá marcha atrás, iniciarán unha campaña para que non se perdan os dereitos de xubilados e traballadores.
A CIG presenta sinaturas reclamando a derrogación da reforma das pensión
Marcos Conde. Secretario comarcal da CIG
© PontevedraViva