O Concello ordena a ENCE a "suspensión inmediata" das obras na fábrica
Por Alejandro Espiño
Ence deberá suspender de maneira "inmediata" todas as obras que está a executar no interior da fábrica de Lourizán. Así llo require o Concello de Pontevedra nun oficio do servizo de disciplina urbanística enviado á compañía pasteira e que foi emitido tras a inspección realizada a estes traballos.
Estas obras, segundo o goberno municipal, foron as causantes do incendio que se rexistrou na fábrica o pasado mércores 5 de decembro.
Os técnicos municipais entenden que as obras que está a realizar Ence, que forman parte do proxecto de integración arquitectónica e paisaxística das súas instalacións, non poden ser consideradas "en ningún caso" como obras públicas e, por tanto, precisa da correspondente licenza urbanística.
Non están amparadas, engaden, polo Plan Sectorial de incidencia supramunicipal, como alega a empresa, xa que ao ser unha entidade privada non está exenta de realizar este trámite urbanístico.
O informe do arquitecto municipal inclúe neste oficio a construción de pérgolas para o estacionamento, a mellora do envolvente do edificio destinado a oficinas e os traballos nos edificios de caldeiras.
Ademais de ordenar a súa suspensión, o Concello abre expediente a Ence como promotora destas obras para que repoña a legalidade urbanística.
A este respecto, a administración municipal advirte que se as obras realizadas son compatibles co ordenamento urbanístico e poden ser legalizables, Ence terá un prazo de tres meses para solicitar a correspondente licenza. En caso contrario, engaden, acordarase a demolición das obras á conta da propia empresa.
Esta resolución será trasladada á Dirección Xeral de Sustentabilidade da Costa e do Mar, adscrita ao Ministerio da Transición Ecolóxica, que foi quen outorgou a Ence a súa concesión para ocupar terreos de dominio público marítimo terrestre.
Relacionadas:
-
A xustiza ditamina que as obras en ENCE precisan de licenza municipal
Por Alejandro Espiño | Creada e actualizada
-
"Demoledora" sentenza contra ENCE: as obras que faga en Lourizán necesitan licenza municipal
Por Alejandro Espiño |
-
A plataforma de Lourizán acusa a Ence de levar a cabo obras ilegais
Por Oskar Viéitez |
-
Ence sinala que se rexistra entrada de madeira con normalidade malia a folga de transportistas
Por Mónica Patxot & Anxo Lourido |
-
VÍDEO.- Un incendio aparatoso, pero de consecuencias menores
Por Natalia Puga & Mónica Patxot |
-
O Concello paralizará as obras de ENCE nas que se produciu o incendio por carecer de licenza
Por Oskar Viéitez |
-
Alarma en Pontevedra por un incendio na fábrica de ENCE en Lourizán
Por Oskar Viéitez | Creada e actualizada