Os comuneiros de Curro recadan case 19.000 quilos de alimentos nunha gala solidaria
Por Redacción
A sétima edición da gala solidaria Música por Alimentos foi todo un éxito. A comunidade de montes de Curro (Barro) logrou reunir 18.865 quilos de alimentos e outros produtos que foron entregados á Fundación Amigos de Galicia.
En concreto, os comuneiros colleitaron 9.350 quilos de alimentos doados por máis dunha vintena de empresas e entidades, mentres que outros 9.515 quilos foron entregados polos asistentes á gala.
A gala estivo amenizada polas orquestras Olympus, Finisterre e Passarela.
A festa, con todo, tivo que ser interrompida ás once da noite debido á noticia do falecemento dunha nova, veciña de Curro.
Os alimentos recadados serán distribuídos nos paquetes que a Fundación Amigos de Galicia entrega mensualmente a familias en situación de pobreza e risco de exclusión social da comarca.