O Concello estuda que as actividades de lecer infantil de Nadal tamén cheguen aos barrios
Por Redacción
As tradicionais actividades de lecer infantil que cada Nadal se organizan na Praza de España poderían chegar este ano a outros barrios da cidade. Esa é a proposta que está a estudar a concelleira de Promoción Económica e Turismo, Yoya Blanco, e este luns trasladoulla á Asociación de Empresarios da Mediana e Pequena Empresa (Aempe).
Segundo explicou, ten a intención de manter a carpa na Praza de España e levar "esa mesma fórmula ou outra" a diversos barrios.
A concelleira reuniuse co presidente de Aempe, José María Corujo, e outros membros da directiva da asociación e analizou as colaboracións que o Concello e Aempe realizan desde hai anos.
Yoya Blanco garante que estas accións terán continuidade e trasladou aos membros de Aempe a súa intención de priorizar a potenciación do comercio local.
Así, segundo detallou, para ela é "esencial" darlle un pulo ao comercio local tanto nas zonas máis céntricas da cidade como en barrios con moitos negocios como A Parda, Loureiro Crespo ou Monte Porreiro.
A reunión, a primeira que Blanco mantén co colectivo empresarial dende que asumiu o cargo de concelleira de Promoción Económica, foi, para a socialista, "moi frutífera".