A choiva encharca as estradas
Por Redacción
Esta fin de semana chuviosa parece deseñada polos donos de Netflix para que quedemos no sofá de casa coa manta.
A inestabilidade atmosférica tradúcese en persistentes chuvascos que localmente poden chegar a ser de tipo tormentoso e que, para este domingo, advirte Meteogalicia que virán ocasionalmente acompañados de saraiba. Tamén as temperaturas mínimas sufriron un lixeiro descenso, e sopra o vento moderado do noroeste.
Estas precipitacións ocasionaron pequenas incidencias, sobre todo a formación de bolsas de auga na calzada.
É o caso de Sanxenxo, onde o Servizo Municipal de Emerxencias tivo que levantar algunhas arquetas en Portonovo.
En Pontevedra os bombeiros tamén tiveron que desatascar a auga que se acumulou en puntos da cidade como a Avenida de Bos Aires.
E en Poio a Policía Local informa de encharcamentos na estrada que comunica o porto de Campelo co aparcamento de Lourido, tamén na zona do Casal da parroquia de San Xoán, na nave de piragüismo en Combarro e pingueiras no Pavillón de deportes da Seca.