Finalizada a colocación dos elementos de xogo dos parques infantís do Lago Castiñeiras
Por Redacción
O Concello de Marín informou este sábado da finalización da colocación dos novos elementos de xogo nos parques infantís do Lago Castiñeiras, a última actuación que desenvolveu o Goberno municipal neste enclave, que se pretende poñer en valor e potenciar, de novo, como un lugar ao que acudir en familia e cos cativos.
Segundo informou o Goberno local, unicamente falta a homologación oficial da obra para que as novas áreas recreativas poidan abrirse ao público. O proxecto tivo un presuposto de licitación de 74.766,18 euros, contando co financiamento da Axencia de Turismo de Galicia, ao abeiro dun convenio asinado entre o ente autonómico, dependente da Consellería de Cultura, e o Concello de Marín.
Os terreos nos que se instalaron os novos parques foron cedidos polas Comunidades de Montes de Marín, a de San Tomé de Piñeiro e a de San Xulián, para que se puidera levar a cabo esta mellora.
O deseño dos elementos, tal e como se pode observar xa, intégrase perfectamente ca contorna natural e contan con materiais que resisten a humidade e as condicións meteorolóxicas deste enclave marinense.
Ademais, buscouse tamén a integración social de todos os nenos, polo que no parque situado nos terreos de San Xulián colocouse un bambán combinado, con dous asentos planos e outro tipo cesta, que está especialmente indicado para persoas con mobilidade reducida.