Feijóo lamenta as "ameazas" da Fanpa e recoméndalles un "baño de realismo" ante a Covid-19
Por Alejandro Espiño
A negativa das ANPAS de Pontevedra a seguir xestionando os comedores dos colexios públicos o próximo curso, ante as dificultades para cumprir o protocolo contra a Covid-19 aprobado pola Xunta, foi cualificada como unha "ameaza" polo presidente galego.
Na rolda de prensa posterior á celebración do Consello da Xunta, Alberto Núñez Feijóo lamentou a postura da federación de nais e pais de alumnos e recoñeceu que no goberno galego existe "sorpresa" por esta situación.
Núñez Feijóo explicou que hai ANPAS de tres provincias que "están dispostas" a facer un "esforzo" por manter a xestión dos comedores "e outra na que non" e avanzou que a Xunta traballará para "poñer un baño de realismo a todos" ante a crise sanitaria.
Tras preguntarse por que nunhas provincias pódese cumprir o protocolo e noutras non, o presidente galego suxeriu que a sociedade debe "reflexionar" sobre isto antes de pensar en se a normativa sanitaria para os colexios "está mal feita, é inadecuada ou é inasumible".
O protocolo aprobado pola Xunta, defendeu Alberto Núñez Feijóo, é "minucioso" e engadiu que "probablemente" sexa o máis completo de todas as comunidades.
"Pido compromiso e realismo a todos os operadores educativos porque hai un dereito constitucional á educación que temos que protexer e implementar", dixo o presidente.
A pesar diso, Núñez Feijóo recoñeceu que haberá que facer un "esforzo" para cumprir os parámetros establecidos e garantiu que en todos os comedores escolares de Galicia " vanse cumprir" as medidas deseñadas polas autoridades sanitarias.
"O curso escolar ten que comezar e non vai a quedar pola administración educativa", concluíu o titular do executivo autonómico.
Relacionadas:
-
Rogelio Carballo, presidente da Fanpa Pontevedra, aclara que a apertura de matrículas dos comedores escolares só é estimativa
Por Anxo Lourido |
-
A Fanpa abrirá o 10 de agosto o prazo para a inscrición nos comedores escolares
Por Redacción |
-
Pontevedra non quere ser a "pagafantas" e esixe á Xunta que asuma o custo das limpezas pola covid nos colexios
Por Oskar Viéitez |
-
As federacións de ANPAS emprazan á Xunta a dialogar con urxencia para manter os comedores escolares
Por Oskar Viéitez & Mónica Patxot |
-
A Fanpa deixará de xestionar os comedores escolares e o Plan Madruga pola imposibilidade de cumprir o protocolo da Xunta
Por Oskar Viéitez |