O Centro de Información á Diversidade e Sexualidade (Cides) do Concello de Pontevedra cumpre o seu primeiros seis meses de funcionamento condicionados por unha pandemia que limitaron as consultas presenciais pero que non evitou o interese da cidadanía pontevedresa. Un total de 33 persoas púxose en contacto neste período co Cides por vías telemáticas como o correo electrónico, o teléfono ou redes sociais como Instagram.

As principais consultas estaban relacionadas con dúbidas da poboación sobre a identidade sexual, pero tamén houbo contactos para solicitar máscaras do Concello coa bandeira LGTBI, conseguir información sobre eventos ou agradecementos pola posta en marcha deste servizo, explicou a concelleira de Igualdade, Yoya Blanco, na súa comparecencia para realizar o balance do primeiro medio ano de funcionamento do centro.

A socialista estivo acompañada pola directora do Cides, Ada Otero, quen detallou o contido dalgunhas consultas, que versaron, entre outros temas, sobre como contar a familiares e amigos a condición sexual, a realidade das persoas trans e solicitudes de información sobre o colectivo e estatísticas por parte de investigadores.

"Agardabamos que houbera menos xente, pero tamén sabemos que hai xente que non vén a nós por vergoña e queremos recalcar que estamos aquí para atender calquera dúbida", remarcou Otero, lembrando que se pode contactar co centro a través de teléfono, correo electrónico ou redes sociais.

Pola súa banda, Yoya Blanco subliñou que "se trata dun centro pioneiro, que comezou a súa actividade días antes do confinamento e que por iso houbo pouco traballo presencial, pero moito por redes, correo e teléfono", concluiu.

Outro aspecto que se porá en marcha nas próximas semanas será a realización de accións formativas telemáticas, anunciou Blanco.