O vicepresidente primeiro da Xunta trasladará ao Goberno central as demandas dos empresarios da provincia
Por Redacción
O vicepresidente primeiro da Xunta, Alfonso Rueda, mantiña este mércores unha reunión co presidente da Confederación de Empresarios de Pontevedra (CEP), Jorge Cebreiros, para estudar posibles formas de colaboración para facer fronte á difícil situación que atravesan as empresas da provincia derivada da pandemia do coronavirus.
Na xuntanza, o vicepresidente primeiro reafirmou o apoio da Xunta, no marco das súas competencias, para garantir o mantemento do tecido produtivo galego. Así mesmo, comprometeuse a trasladar estas necesidades ao Goberno central, tanto para a súa implicación directa, como para que sexa tido en conta dentro do Plan de Recuperación Europeo.
No encontro, trataron as dificultades que están a afrontar as empresas e pemes galegas e, máis polo miúdo, o caso das empresas turísticas, un dos sectores máis afectados pola pandemia. Neste sentido, coincidiron na necesidade de impulsar medidas concretas de apoio, con iniciativas como o programa da Xunta 'Galicia Destino Seguro'.
Recentemente, o vicepresidente primeiro reclamaba ao Goberno central que poña en marcha máis medidas de apoio, como manter os expedientes de regulación de emprego temporal deste sector máis aló da Semana Santa de 2021; reducir o IVE turístico ao 4% de xeito temporal; e intensificar a implicación do Goberno central no Xacobeo 2021, como oportunidade para relanzar a economía, sempre que as condicións da pandemia o permitan.
Relacionadas:
-
Rueda aborda a replanificación do Xacobeo cos colectivos de Amigos do Camiño de Santiago
Por Oskar Viéitez & Mónica Patxot |
-
Rueda reúne en Sanxenxo o Clúster de Turismo de Galicia
Por Oskar Viéitez |
-
Cambio á fronte dos empresarios pontevedreses: Jorge Cebreiros, novo presidente da CEP
Por Redacción |