Xusto a tempo para ver ao equipo dos seus amores, o Pontevedra Club de Fútbol, estrear tempada en Pasarón. Dolores Calviño, a querida Señora Lola, xa preside en todo o seu esplendor unha das entradas ao estadio ao que dedicou tantos anos da súa vida.

Nin a choiva nin o vento destes últimos días impediron ao artista Yoseba Muruzábal terminar o mural dedicado a esta figura histórica do Pontevedra que, a partir de agora, será un auténtico anxo custodio para o club que tanto quería.

Ao longo dos últimos días, o autor do mural esmerouse en puír todos os detalles das dúas imaxes que se plasmaron na medianeira do edificio.

Así, ademais de perfilar o rostro da protagonista e vestila co seu eterno mandil, colocou nas súas mans unha bengala de fume cor granate que, como afirmaba recentemente Yoseba Muruzábal, achega un punto irónico e de graza a todo o conxunto artístico.

O mural está dividido en dous partes. Plasmouse un retrato da Señora Lola facilitado pola súa familia e unha fotografía dela cos brazos levantados celebrando un gol. Esta última imaxe, feita polo fotógrafo Miguel Vidal, forma parte do arquivo de Diario de Pontevedra.

O Concello de Pontevedra, impulsor deste mural a través dos programas A memoria das mulleres e o plan de mellora da paisaxe urbana, prevía inaugurar o mural cun sinxelo acto público, con invitación aos veciños do Burgo e a representantes do Pontevedra.

A pesar diso, aínda non está claro o que se poderá facer, entrar en vigor as novas restricións da Xunta de Galicia polo avance da pandemia da covid-19.