A falta de de pouco máis dun mes para que se conmemore o Día Internacional contra a Violencia de Xénero, o próximo 25 de novembro, a subdelegada do Goberno en Pontevedra, Maica Larriba, ofrecía este mércores as cifras dos casos activos na provincia de Pontevedra.

Os casos activos en violencia de xénero son aqueles que requiren un seguimento policial. O número de casos e os datos referidos ao nivel de risco que comportan para as vítimas recóllense no Sistema de Seguimento Integral nos casos de Violencia de Xénero (Sistema VioGén), dependente da Secretaría de Estado de Seguridade do Ministerio do Interior.

Maica Larriba indicaba que a data do 20 de outubro de 2020 na provincia de Pontevedra o Sistema VioGén rexistraba un total de 1.114 casos activos, dos cales 7 correspondíanse con menores de idade.

Por franxas de idade, a estatística arroxa os seguintes resultados:

• Menores de 18 anos: 7 casos activos (2 de risco medio, 1 de baixo e 4 de risco non apreciado)
• 18 a 30 anos: 268 casos activos (1 de risco extremo, 3 alto, 42 medio, 122 baixo e 100 non apreciado)
• 31 a 45 anos: nesta franxa de idade concéntrase o maior número de casos con 500 activos (8 de risco alto, 80 medio, 216 baixo e 196 non apreciado)
• 46 a 64 anos: 298 casos activos (1 de risco alto, 29 medio, 119 baixo e 149 non apreciado)
• Maiores de 65 anos: 40 casos activos (1 de risco medio, 10 baixo e 29 non apreciado)

 

Un dato que chama a atención é que durante o segundo trimestre de 2020, coincidindo cos meses do confinamento, rexistrouse unha baixada considerable no número de denuncias con respecto ao mesmo período do ano anterior. No segundo trimestre de 2019 houbo 573 denuncias fronte ás 490 nos mesmos meses de 2020.

Máis aló das condicións da pandemia, os datos indican que o presente ano, xa nos meses anteriores ao confinamento, reflectíase unha tendencia á baixa no número de denuncias, xa que, se no primeiro trimestre de 2019 presentáronse 592 denuncias, nos primeiros meses de 2020, comparativamente, reduciuse o seu número ata as 521 denuncias.

A subdelegada do Goberno ofrecía estes datos acompañada de Manuela Vilaboy, a xefa da Unidade Contra a Violencia sobre a Muller da Subdelegación do Goberno en Pontevedra.