O PP apoia a proposta da confraría de crear aparcamento no consultorio médico de Raxó
Por Oskar Viéitez
Os representantes do PP de Poio na comisión de urbanismo preguntaron este martes ao goberno local sobre a oferta da Confraría San Gregorio de ceder terreo para a creación de prazas de aparcamento no consultorio médico de Raxó.
Esta proposta foi trasladada polo patrón maior ao Concello hai uns meses pero o Concello ainda non habilitou estes espazos de estacionamento para persoal sanitario, persoas con discapacidade ou vehículos de emerxencias.
"A creación de prazas de estacionamento é unha competencia exclusivamente municipal, e todos coñecemos o problema que existe en Raxó e en todo Poio coa falta de estacionamento", explicou Cochón.
Dixo a concelleira do PP que "a iniciativa da confraría parécenos unha mostra de xenerosidade e ademais, moi necesaria, neste momento de crise sanitaria xerada pola Covid, no que todas as medidas que redunden no beneficio do persoal sanitario e os usuarios da sanidade merecen especial atención".
O goberno local dará unha resposta por escrito ás preguntas do PP.