Barro pasa nunha semana do nivel básico de restricións ao medio alto polo avance imparable da covid-19
Por Natalia Puga
O avance imparable da covid-19 elevou de forma importante as restricións impostas no concello de Barro para intentar frear a expansión da pandemia. Pasa de estar no nivel básico ao medio alto, o mesmo que está activo nestes momentos en Pontevedra, Poio, Marín e Meaño.
O comité clínico da Consellería de Sanidade que fai seguimento da evolución da covid-19 en Galicia acordou este cambio na súa reunión deste luns. Na última reunión, de hai tan só unha semana, mantivérase o nivel básico. Xusto nesta xornada, no municipio hai 30 casos activos de coronavirus.
O nivel medio alto de restricións implica limitacións especiais de mobilidade, isto é, un peche perimetral do municipio, que será de forma individual, con ningún máis. Ademais, a hostalería só estará aberta ata as 17.00 horas cun 30% de capacidade no interior e 50% no exterior e as reunións deberán ser dun máximo de 4 persoas.
O comité clínico non acordou cambios no resto da área sanitaria, de maneira que todos os concellos continúan ata a vindeira reunión coa mesma situación que ata agora.
Todas estas medidas publicaranse no Diario Oficial de Galicia de mañá martes e entrarán en vigor ás 00:00 horas deste mércores.
Sanidade lembra a obrigatoriedade de cumprir todas as medidas establecidas pola Xunta Galicia, co ánimo de mellorar a situación epidemiolóxica na comunidade e así poder ir diminuíndo as restricións vixentes.
O comité abordou tamén as medidas a aplicar pola Consellería de Sanidade de cara ao fin de ano, pero ata este martes pola mañá non se darán a coñecer.
Os concellos de Viveiro, Verín, Monterrei, Castrelo do Val, Cualedro, Noia e Lousame pasan ao nivel máximo de restricións. Así mesmo, o comité decidiu suavizar as medidas restritivas nos concellos de Lugo, Ponteareas e Rodeiro, que pasarán ao nivel básico de restricións, co que se suprimirá a limitación de mobilidade.
Igualmente, acordou que os concellos de Redondela, Xinzo de Limia, Carral, Xove, Muros, Outes, Porto do Son e A Pobra do Caramiñal pasan ao nivel medio alto de restricións. Tamén acordou engadir ao listado de concellos con vixilancia especial a Val do Dubra, Vedra, Padrón e Rois.
Relacionadas:
-
Evolución desigual da covid-19 por concellos: Sanxenxo chega a unha incidencia acumulada de 340 e Marín baixa a 102
Por Natalia Puga |
-
Sanidade fará un cribado xeneralizado a toda a poboación da Illa, o concello "que máis preocupa, sen ningunha dúbida"
Por Natalia Puga |
-
Sete altas permiten aliviar a presión da covid-19 nos hospitais de Pontevedra e O Salnés
Por Alejandro Espiño |
-
Galicia recomenda un Fin de Ano "de conviventes" aínda que permitirá moverse para reunións familiares
Por Alejandro Espiño |
-
Sanidade adianta prazos e as primeiras vacinas fronte á covid-19 da área sanitaria póñense este martes en Vilagarcía
Por Natalia Puga |