Doce persoas perdían a vida este luns, segundo notificaba a Consellería de Sanidade, debido ao coronavirus. Entre elas atópase unha muller de 87 anos, que falecía no seu domicilio particular no municipio de Pontevedra. 

Coa morte desta muller a cifra de falecementos na área sanitaria de Pontevedra e O Salnés ascende a 88 persoas desde que comezaron a notificarse as vítimas da pandemia. Trátase da cuarta vítima que se rexistra no últimos tres días no municipio, tras notificarse outros tres decesos por covid-19 durante a fin de semana no Hospital Montecelo.

Á muller pontevedresa hai que sumar dúas mortes na provincia, unha muller de 92 e un home de 83 anos, que falecían no Hospital Álvaro Cunqueiro da cidade olívica. A muller procedía da Residencia Moledo de Vigo. 

Ademais, hai que sumar a perda dunha muller de 91 anos no Complexo Hospitalario da Coruña; tres mulleres de 88, 87 e 76 anos no Complexo Hospitalario de Ferrol; dous homes, de 93 e 84 anos no Complexo Hospitalario Universitario de Santiago; un home de 84 anos na residencia San Bartolomeu de Xove; outro home, de 95 anos, na residencia DomusVI de Vimianzo e, por último, unha muller de 104 anos de idade na residencia Santa María de Verín.

Segundo a Consellería de Sanidade, todas estas vítimas diagnosticadas coa enfermidade do covid contaban con historiais nos que figuraban enfermidades previas.

Estas doce mortes producidas nas últimas horas elevan a 1.462 persoas falecidas en Galicia por coronavirus desde que transcenden os datos de mortes provocados por esta doenza.