A covid-19 parece estar desbocada e alcanza cotas nunca antes vistas. A quinta vaga está a levar á área sanitaria a bater records de contaxios. Nas últimas 24 horas, detectáronse 304 novos infectados. O número de casos activos disparouse ata os 1.550. 

Afortunadamente, e sen dúbida polo efecto das vacinas, esta explosión de contagios apenas ten repercusión nos hospitais. Hai 14 pacientes hospitalizados nos tres hospitais da área sanitaria. Son só dous máis dos que había onte.

A maioría deles (9) están ingresados na planta de hospitalización de Montecelo, mentres que hai un no Hospital do Salnés e outro no QuirónSalud Miguel Domínguez. 

Os outros tres hospitalizados, en estado máis grave, atópanse ingresados na unidade de coidados críticos (UCI) de Montecelo.

O resto dos que contraeron o virus, outras 1.536 persoas, atópanse illadas nos seus domicilios e recuperándose baixo supervisión médica.

Desde o inicio da pandemia 14.512 pacientes da área sanitaria superaron a covid-19, 39 nas últimas 24 horas, e rexistráronse 181 falecementos asociados ao virus.

En canto á realización de probas PCR, fixéronse na área sanitaria de Pontevedra e O Salnés un total de 261.864, 717 nas últimas horas. A estas probas súmanse as 93.637 probas de antíxenos e outras 97.194 probas de detección realizadas ata a data. 

INCIDENCIA EN GALICIA

A nivel autonómico a Dirección Xeral de Saúde Pública informa que o número de casos activos de coronavirus en Galicia é de 8.319, 1.111 máis que o día anterior. Deles 1.330 son da área da Coruña, 700 da de Lugo, 1.617 da de Ourense, 1.550 da de Pontevedra, 1.845 da área de Vigo, 976 da de Santiago e 301 da de Ferrol.

Do total de pacientes positivos, 14 están en UCI, 82 en unidades de hospitalización e 8.223 no domicilio. Por agora, en Galicia hai un total de 127.459 persoas curadas, rexistrándose 2.441 falecementos.

Desde o inicio da pandemia realizáronse en Galicia 2.447.140 probas PCR, 8.403 nas últimas 24 horas, que permitiron detectar 1.253 novos infectados.