A Festa do Mexillón e o Berberecho, reclamo para turistas e peregrinos na súa 27 edición
Por Redacción
A Festa do Mexillón e o Berberecho de Vilanova de Arousa celebrou este fin de semana a súa XXVII edición. A festa gastronómica conta coa declaración de Interese desde 2014 e é unha das 128 Festas de Interese Turístico de Galicia, ás que se suman 12 de Interese Turístico Nacional e outras 12 de Interese Turístico Internacional.
O vicepresidente primeiro da Xunta, Alfonso Rueda, asistiu a esta edición e recibiu o Mexillón de Ouro xunto cos presidentes das cámaras municipais das localidades portuguesas de Ponte de Lima e Braga, Víctor Manuel Alves e Antonio José Pereira respectivamente. Tamén acudiu o delegado territorial da Xunta en Pontevedra, Luis López.
Durante a súa intervención, Rueda destacou a importancia desta celebración para poñer en valor os produtos do mar da zona e contribuír á súa promoción turística. Ademais, sinalou que se converte cada ano nun reclamo para turistas e peregrinos que visitan o concello pola súa capacidade para difundir os seus recursos turísticos e dinamizar a economía local.
Por último, a Festa do Mexillón e o Berberecho é unha das apostas da Xunta de Galicia polo turismo sostible e de calidade vencellado ao Camiño de Santiago e ao Xacobeo, identificando o Mar de Arousa como itinerario vencellado á chegada dos restos do Apóstolo Santiago a Galicia.