A parlamentaria socialista Paloma Castro vén de presentar unha batería de iniciativas na Cámara galega para instar á Xunta de Galicia a que inicie de inmediato as xestións oportunas para que Abanca manteña a súa sucursal no concello de Campo Lameiro.

O peche da oficina bancaria, previsto para o 8 de setembro, sinala que "afectará sen dúbida á economía da zona, nomeadamente servizos, hostalaría e comercio".

A maiores, indica a parlamentaria pontevedresa, a veciñanza "deberá desprazarse a sucursais doutros municipios como Moraña (a 8 quilómetros) ou Cerdedo-Cotobade (a 13) para realizar calquera xestión ou trámite bancario que precise".

Deste xeito, Paloma Castro alerta de que este peche vai repercutir moi negativamente na calidade de vida de toda a poboación, especialmente "na de máis idade, á que lle é imposible acceder ás novas utilidades tecnolóxicas coas que se pretende substituír o trato persoal cos empregados da sucursal".

Castro demanda "a inmediata intervención das administracións públicas" e apunta que "a atención ás comarcas rurais e a loita contra o seu despoboamento pasa polo mantemento e consolidación dos servizos básicos".