Os traballos de renovación do campo de fútbol de San Pedro entran na súa recta final
Por Redacción
Marín completará moi pronto a ansiada renovación do campo de fútbol de San Pedro. As obras para a substitución completa do terreo de xogo entraron xa na súa recta final.
Nelas, invístense preto de 405.000 euros, dos que 310.000 saen dunha achega da Deputación de Pontevedra con cargo ao Plan Concellos.
O deputado de Cooperación, Santos Héctor, visitou as obras acompañado da alcaldesa, María Ramallo, e comprobou os resultados, xa visibles, de modernización da instalación deportiva.
Os traballos optimizarán a práctica de fútbol 11 e tamén permitirán a celebración de dous partidos simultáneos de fútbol 7. As porterías desta última novidade son pregables.
A anterior superficie acumulaba dez anos de uso e presentaba desgaste.
As dimensións totais do terreo son de 104,5 x 63,94 metros. O céspede artificial será de fibras bicolor cun espesor de 240 micras e unha altura de 45 milímetros. O novo céspede, de cuarta xeración, cumpre con todos os requisitos de homologación FIFA e normas UNE.
Será resistente aos raios ultravioleta e estará lastrado con area de sílice e caucho e dotado dun moderno sistema de rego automático.
A obra incluíu tamén a demolición da grada descuberta para substituíla por un muro de peche de formigón. Deste xeito resolveuse a diferencia de cota coa parcela adxacente.
A superficie que se gaña será recuberta con céspede artificial e funcionará como espazo para quecemento durante os partidos.
O campo municipal de San Pedro é utilizado habitualmente polo Marín Club de Fútbol e, antes da pandemia, prestaba servizo a uns 250 deportistas tanto de fútbol como de atletismo. Agora, cun aspecto máis moderno e con maior funcionalidade mellorará as súas prestacións.
Relacionadas:
-
O PSOE solicita o arranxo da cantina do campo de fútbol de San Pedro
Por Redacción |
-
O PSOE critica a pouca distancia de separación dos valos no campo de fútbol de San Pedro
Por Redacción |
-
Avanzan os traballos en San Pedro coa instalación do céspede sintético
Por Redacción |
-
Arrancan as obras para cambiar o céspede do Campo de fútbol de San Pedro
Por Redacción |