Faleceu Mora Morandeira, comisario da Policía Nacional de Pontevedra durante 13 anos
Por Redacción
Este luns faleceu en Almería, cidade na que residía en compañía da súa familia, Enrique Mora Morandeira, que entre os anos 1991 e 2004 foi comisario xefe do Corpo Nacional de Policía de Pontevedra.
Enrique Moura iniciou a súa longa carreira profesional na policía na Comisaría Provincial de Lugo da que pasou á comisaría de Ribeira e xa como comisario foi Xefe da Brigada de Seguridade Cidadá de Pamplona, comisario provincial de Almería e Xefe Superior de Policía de Sevilla.
No ano 1991 incorpórase como comisario xefe provincial de Pontevedra onde permaneceu ata a súa xubilación.
Segundo lembran os seus compañeiros, durante a súa carreira policial Enrique Moura soubo gañarse o respecto e o agarimo dos seus compañeiros e subordinados polo seu trato afable e cordial, "sempre disposto a axudar no que fose necesario, mesmo con problemas de índole persoal, sen que iso impedise a súa esixencia e rectitude nas tarefas profesionais".
Integrouse totalmente na sociedade pontevedresa na que deixou numerosos amigos.
Nun comunicado emitido desde a comisaría provincial remarcan que "á súa esposa Mercedes, fillos e netos queremos expresarlle a nosa dor e respecto nestes difíciles momentos. Descansa en paz".