Representantes sindicais plantan á xerencia da área sanitaria por falta de información sobre impagos ao persoal
Por Mónica Patxot & Anxo Lourido
Os distintos representantes sindicais da comisión de centro de atención hospitalaria están fartos e así o expresaron este venres durante a reunión cos membros da xerencia. Abandonaron este encontro ao sentirse agraviados pola falta de respecto cara ao seu traballo.por parte da dirección.
Manoli Martínez, secretaria da comisión, denuncia a "política de feitos consumados" da xerencia da área sanitaria ao negociar directamente cos traballadores sen informar aos sindicatos. Unha práctica que consideran "ilegal" e, por este motivo, non volverán reunirse ata que exista respecto cara ao labor sindical.
A pinga que colmou o vaso foi a falta de pagamento ao persoal no mes de decembro das noites e festivos traballados. Os representantes sindicais, indica Emma Rodríguez, de Satse, informáronse grazas aos propios afectados e non a través da xerencia como sería preceptivo. Explica que o erro por parte da dirección é "moi grave" porque na nómina dun traballador por quendas supón un terzo do seu salario e "como comisión do centro de atención hospitalaria deberiamos ter información". Afirman que deberían notificarlles ese erro para "darlle explicacións aos traballadores", que terán que esperar á cobranza da nómina de xaneiro para recibir as cantidades que se lles deben.
Begoña Mallo, da CIG, expón que, en todo caso, as informacións dos cambios de quenda ou dos aumentos e descensos de persoal en distintos departamentos como Enfermería son ocultados aos representantes sindicais e só se trasladan tres meses máis tarde cando xa foron resoltas as incidencias.
Secundino Barreiro, de Omega, pon como exemplo destas prácticas a situación que se sofre no Punto de Atención Continuada (PAC) de Caldas de Reis. Neste servizo, o plan funcional establecera que dous facultativos deben traballar de luns a venres desde as 15.00 ata as 22.00 horas e, con todo, a xerencia decidiu que só atenda un médico á poboación sen informar aos integrantes da comisión. "Non ten sentido isto. Por que temos que pedir información que xa deberiamos ter? Non podemos seguir así", denuncian.
"O que fai esta xerencia non é normal. Non respectan a Lei orgánica de liberdade sindical. É moi grave. Non é un diálogo, é un monólogo. Con esta actitude non podemos continuar", alerta Emma Rodríguez. Por este motivo non acudirán ás próximas comisións e estudarán actos de protesta.
"Queremos solucións aos problemas que trasladamos", advirten os representantes sindicais, cansos de que os ignoren desde a xerencia da área sanitaria que lidera José Ramón Gómez.