Bará acusa á Xunta de querer "forzar o peche" de ENCE por "réditos electorais"
Por Alejandro Espiño
Para o BNG, a Xunta de Galicia está buscando "forzar o peche" da fábrica de Ence en Pontevedra, en vez de buscar alternativas para o seu traslado, coa fin de "crear un conflito" co que poder sacar "réditos electorais" en Pontevedra.
Así o denunciou este mércores o deputado Luis Bará, que a través dunha pregunta formulada no Parlamento instou ao goberno galego a aclarar se está disposto a "respectar" as resolucións xudiciais sobre a pasteira ou seguirá utilizando "artimañas" para "manipular" a opinión pública.
Bará reiterou que "intentar burlar a lei" mediante unha interpretación "sesgada e parcial" do informe do Consello Consultivo sobre unha futura adscrición de ENCE ao porto de Marín forma parte da "cerimonia de confusión" emprendida polo executivo autonómico.
A "verdadeira intención" do PP, engadiu o deputado nacionalista, "é crear unha ficción e enganar a sociedade e traballadores para facer crer que ENCE pode seguir aí", a pesar de que existe unha sentenza da Audiencia Nacional.
Será o Supremo o que teña que decidir, recordou Luis Bará, que acusou aos populares de facer "seguidismo" á empresa para continuar coa súa "estratexia de confrontación".
"Non se pode burlar unha decisión xudicial buscando un atallo e manipulando un informe", concluíu o deputado do BNG.
A resposta a esta formulación veu da man do director da Axencia Galega da Industria Forestal, José Ignacio Lema, que reiterou que a Xunta "respecta todas as posicións sobre Ence" pero entende que a "única alternativa viable" é a súa continuidade en Lourizán.
Tras apuntar que este tema ten que abordarse "con respecto e realismo", Lema apuntou que o peche de Ence é unha "ameaza que planea" sobre o sector forestal galego, polo que a Xunta "ten a obriga de defender os intereses de Galicia".
De aí que solicitaran o informe sobre a posible adscrición dos terreos industriais de Ence ao porto, sinalando que o Goberno "lamentablemente se negou" a unha opción que era "viable".
"Tras ser o causante desta situación, din non á proposta de continuidade que fixeron os traballadores e a Xunta e non ofrece alternativas", subliñou o director desta axencia forestal, que recordou que tampouco se encargou o estudo de posibles novas localizacións.
Relacionadas:
-
O Concello, tras a decisión do Supremo de admitir o recurso de ENCE: "Non agardábamos outra cosa"
Por Alejandro Espiño |
-
ENCE fixa entre 2023 e 2024 o peche da súa fábrica en Pontevedra se o Supremo non atende os seus recursos
Por Redacción |
-
O BNG esixe á Xunta que desista de tramitar o proxecto sectorial de ENCE en Lourizán
Por Redacción |
-
Galicia en Común acusa no Congreso á Xunta de tramitar licenzas de obra a Ence malia as sentenzas que anulan a prórroga
Por Mónica Patxot & Redacción |
-
O Estado e o Concello de Marín tamén rexeitan a modificación do proxecto sectorial de ENCE
Por Oskar Viéitez |