Máis dun milleiro de persoas participaron na primeira fase de Noites Abertas
Por Redacción
O Concello de Pontevedra conclúe que o programa Noites Abertas "logrou acadar esa normalidade que tanto botaba de menos" ao rexistrar as 1.066 persoas participantes e 53 de público.
Este programa de procura de alternativas de ocio saudables atópase no ecuador do seu calendario, o que para a Concellaría de Xuventude "só pode ser un indicador da gana que a mocidade teña de recuperar esta vía de socialización, aprendizaxe e ocio".
O concelleiro de Xuventude, Alberto Oubiña sinala que no seu departamento "estamos moi contentos coa resposta da mocidade, ademais do funcionamento de todo o programa. É moi positivo ver como podemos recuperar este tipo de actividades e achar un interese tan masivo e con tanta gana de gozar con elas".
Oubiña adiantou que logo das vacacións de Semana Santa Noites Abertas entrará na súa segunda fase "e agardamos que non só manteña o ritmo, senón que aumente. Está sendo unha experiencia realmente positiva para todos os implicados, tanto para a rapazada, como para os monitores e os organizadores".
"Estamos moi contentos coa resposta da mocidade, ademais do funcionamento de todo o programa"
Polo miúdo, o 90 % das participantes nas actividades foron mozos e mozas de entre 12 e 25 anos, sendo 541 os primeiros e 525 as segundas. Cada fin de semana, de media, Noites Abertas logrou chamar a atención de 266 persoas que participaron de xeito activo nalgunha das súas actividades, "quedando demostrado que o programa funciona como un forte polo de atracción para a rapazada da cidade que procura alternativas de ocio saudábeis e de socialización positiva", valora o concelleiro nacionalista.
Dentro das actividades que máis éxito tiveron, e que mesmo contaron listaxe de espera, aparecen os doces veganos, a lámpada marabillosa, o obradoiro de escritura creativa e ilustración, o bordado mexicano, personaliza a túa totebag, xoiería con resina vexetal, eco-estampación, encadernación, bádminton libre e origami-colares.
Outras actividades de moito éxito estaría o curso de batería, baile galego, xadrez e os xogos de mesa non convencionais.
Só tres actividades tiveron que ser canceladas con antelación: origami, defensa persoal e sexualidade. A actividade específica do Plan de Prevención de Drogas contou con 8 persoas na súa primeira sesión.
"Queremos destacar, ou facer fincapé, nunha das actividades deste ano que xa presentamos no seu día, pero que supoñíamos importante. A Lámpada marabillosa, ese espazo de socialización e esparexemento que habilitamos na Casa Azul e que non ten unha finalidade concreta, máis aló que permitir a xuntanza, a conversa ou o xogo libre", sinala o edil.
"Está resultando unha experiencia moi positiva, cunha concorrencia constante de participantes que buscan relacionarse, pasar un anaco agradábel ou coñecer outros mozas e mozas coma eles. É unha actividade importante, porque alén da vixilancia que hai, con monitores presentes, non é algo dirixido, é un espazo onde é a rapaza a que se expresa e fai o que considera, recuperando esa socialización que a pandemia restrinxiu e limitou", conclúe Oubiña.
Relacionadas:
-
Noites Abertas recibe 135 propostas para a súa nova edición
Por Redacción |
-
Ábrese o prazo para presentar propostas de actividades en Noites Abertas 2023
Por Mónica Patxot & Anxo Lourido |
-
O PP propón ampliar o programa de Noites Abertas para sacar os menores do botellón
Por Diana Eiras & María José Pita |
-
Instalan no Gafos seis hoteis para bichos
Por Oskar Viéitez |
-
'Gaming na Rúa' consolídase cunha segunda edición máis global no Centro Leste
Por Redacción |
-
Noites Abertas sorprende con 'El juego del calamar' entre as súas novas propostas
Por Raquel Currás Martínez |
-
Noites Abertas 2022 abre prazo para a presentación de propostas
Por Mónica Patxot & María José Pita |