A procesión do Viático lucirá un manto de flores elaborado por alfombristas de Ponteareas
Por Redacción
Este ano a alfombra floral do Viático será elaborada por especialistas nesta arte, os alfombristas de Ponteareas. O Gremio de Mareantes e a parroquia de Santa María convidaron a participar nesta elaboración tradicional para ofrecer a súa particular interpretación creativa, tal e como realizan na procesión do Santísimo Sacramento no seu municipio desde fai douscentos anos. ponteareas está considerada o berce do alfombrismo en España.
Integrantes da Asociación de Alfombristas de Ponteareas viaxarán o sábado 23 a Pontevedra para iniciar os traballos na rúa Irmáns Nodais a partir das 18.00 horas. Ao día seguinte, o domingo 24 de abril, as rúas da parroquia de Santa María serán escenario da particular ofrenda floral con ese manto para o paso do Viático, recollendo o estilo das alfombras que se crean en Ponteareas con motivo da celebración do Corpus Christi.
O Viático é un desfile relixioso que rememora o esplendor medieval de Pontevedra, nos anos en que o barrio mariñeiro do Lérez e o Gremio de Mareantes, entidade formada no século XII, realizaban esta manifestación de fe.
O deseño do manto floral dedícase ao propio Gremio de Mareantes e recollerá elementos de relación co Camiño de Santiago.