Reapertura de vacinódromos este venres 7 en Pontevedra e O Salnés para inxectar a cuarta dose anticovid
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/a2c/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/61cdde2d87-20211230-patxot-vacunacion-3474.jpg)
© Mónica Patxot
Este venres 7 de outubro comeza a campaña de vacinación masiva da cuarta dose, segunda de reforzo, da vacina contra a covid-19. Os vacinódromos na área de Pontevedra e O Salnés serán o edificio administrativo da Xunta de Galicia en Campolongo; o recinto de Fexdega en Vilagarcía en días laborables e o Hospital do Salnés durante as fins de semana.
Nos primeiros días está a citarse a persoas maiores de 85 anos e, a continuación, irán citándose a persoas con idades comprendidas entre os 80 e os 84 anos. Estas persoas, segundo Marina González Zar, enfermeira de coordinación de vacinación da área sanitaria, contarán con facilidades para que poida administrarse a vacina.
O recinto estará dotado de cadeiras de rodas para as persoas con mobilidade reducida e haberá persoal de apoio durante o tempo de espera nas colas. Ademais, no caso do vacinódromo de Pontevedra, proporcionarase un ticket para o aparcamento de Campolongo coa primeira hora gratis para aquelas persoas que estean citadas e vacínense.
Esta fin de semana atópanse citadas 3.325 persoas nestes espazos da área sanitaria. Os horarios serán de mañá e tarde, de 09.00 a 14.00 horas e de 15.30 a 20.30 horas.
Marina González Zar indica que aquelas persoas que foron diagnosticadas con covid de maneira recente deben esperar tres meses desde o día do diagnóstico para aplicarse a vacina no caso de que teñan máis de 80 anos.
No caso das persoas menores de 80 anos que padecesen a enfermidade recentemente e non pertenzan a un grupo de alto risco ou non vivan nunha residencia sociosanitaria deberán esperar cinco meses desde o diagnóstico para recibir esta dose.