Lores cualifica de "absolutamente insultante" o tratamento dos orzamentos da Xunta de 2023 cos cidadáns de Pontevedra
Por Natalia Puga
O proxecto de orzamentos da Xunta de Galicia supón, para Pontevedra e os seus cidadáns un tratamento "absolutamente insultante". Así o considera o alcalde da cidade e líder do BNG, Miguel Anxo Fernández Lores, moi crítico coas contas do Goberno galego.
Lores amósase "preocupado" polos orzamentos que se presentaron esta semana e considera "moi decepcionante" que non recollan ningún dos proxectos de futuro que ten o Concello de Pontevedra.
Fala, en concreto, do convento de Santa Clara, recentemente adquirido polo Concello, e da recuperación ambiental da Ría de Pontevedra e dos ríos Gafos e Lérez e a zona da Xunqueira, para os que "non hai ningunha mención" nas contas autonómicas para 2023.
O proxecto de Santa Clara aínda está en fase de definición, pero, a preguntas dos xornalistas, Lores considera que o que bota en falta é "unha referencia" do Concello nos seis tomos do proxecto orzamentario.
Para Miguel Anxo Fernández Lores, os orzamentos para o vindeiro ano son "ao trantrán", ademais de "rutineiros" e "burocráticos", pois tan só recollen "o que obrigatoriamente teñen que recoller", isto é, aquelas obras que están en execución como o Gran Montecelo, o novo emisario submarino ou a estación intermodal, para os que ve inevitable que recollan partidas "para a súa continuidade".
Lores amósase especialmente defraudado polo tratamento da Xunta ás estradas autonómicas que pasan por Pontevedra, pois son da súa competencia e "ten a responsabilidade de resolver os problemas de seguridade vial", pero non contempla ningunha mellora máis aló de "500 metros nunha estrada de 5.000", a estrada vella de Marín.
Bota de menos proxectos para a estrada de Vilagarcía, a estrada O Pino-Bora á altura do núcleo de centralidade parroquial de Marcón ou a estrada de Campo Lameiro ao seu paso por Lérez e critica que a Xunta retire dos orzamentos a Variante de Alba. Este último proxecto pasa dun orzamento de 500.000 euros en 2022 a 90.000 para 2023.
Fronte a esta falta de proxectos en estradas autonómicas en Pontevedra, mira cara a proxectos que si se executan con perspectiva de seguridade vial como os que se executaron en municipios como Sanxenxo. Ademais, lembra que o anterior presidente da Xunta, Alberto Núñez Feijóo, esquecera as estradas pontevedresas e o novo responsable, Alfonso Rueda, a pesar de ser de Pontevedra, segue na mesmas liña.
Estes primeiros orzamentos de Rueda como presidente centrarán a reunión que manterá con Lores o vindeiro martes e o alcalde aínda amosa "esperanza de que o presidente recapacite".
Lores amósase disposto a "seguir colaborando" coa Xunta, pero pide ao Goberno galego a mesma "lealdade" institucional que ten sempre o Concello.
Relacionadas:
-
O BNG denuncia a "discriminación" de Poio nos orzamentos da Xunta
Por Oskar Viéitez |
-
Rafa Domínguez afea a "política de anuncios" do Concello de Pontevedra
Por Redacción |
-
Domínguez pide a Lores que se "quite la camiseta del BNG y se ponga la de todos los pontevedreses" na súa reunión con Rueda
Por Oskar Viéitez |
-
Tino Fernández: "A Xunta debería facer un maior esforzo para compensar a Pontevedra por moitos anos de abandono"
Por Natalia Puga |
-
"Eu agardo que sexa lexislatura da nosa cidade", afirma Lupe Murillo
Por Oskar Viéitez |
-
88 millóns para Pontevedra nos orzamentos da Xunta para 2023
Por Alejandro Espiño |
-
As obras do Gran Montecelo "avanzan a pleno rendemento" e acadarán este ano o noveno andar
Por Oskar Viéitez & Mónica Patxot |