David Castro, alcalde de Ribadumia, volve ao PP para ser candidato nas municipais
Por Redacción
David Castro gañou as anteriores eleccións municipais con maioría absoluta ao presentarse á fronte da lista de Independentes de Ribadumia. A falta de tres meses para a nova cita coas urnas o actual alcalde decidiu regresar ao Partido Popular, agrupación na que militara durante anos e coa que foi concelleiro no mandato de 1999.
Agora, Castro figurará como o candidato do PP á alcaldía nos comicios do próximo 28 de maio.
Luís López, presidente provincial do PP, e David Castro anunciaban este venres a decisión. Segundo explicaba López a decisión xurdiu nas últimas semanas dunha forma natural con motivo do cambio de ciclo político. Sinalan que esta opción é a mellor para afrontar esta nova etapa "xuntos somos máis fortes e tamén é a mellor solución de futuro para Ribadumia", afirma o presidente provincial dos populares.
Tamén destacou o traballo e a xenerosidade de todos os independentes para incorporarse ao PP, cando moitos deles xa formaran parte deste partido. Luís López avoga por acoller a todas as persoas do centro-dereita "para seguir conformando un proxecto político coa maior base e respaldo social posible".
David Castro amosou a súa satisfacción "por sumar e aglutinar as forzas dos dous partidos e por volver ao Partido Popular e a un proxecto político co que sentimos plenamente identificados", apuntou sinalando que o traballo desenvolvido durante este mandato terá continuidade.
Asegura que a decisión non é "estraña e entra dentro da absoluta normalidade porque a práctica totalidade dos que conformamos independentes de Ribadumia fomos integrantes do PP durante moitos anos", engadiu David Castro indicando que no novo marco político as principais forzas teñen máis peso.
Relacionadas:
-
O BNG de Ribadumia presenta no Auditorio a candidatura encabezada por Vanessa Fariña
Por Redacción |
-
Os concelleiros do PP de Ribadumia aseguran sentirse "traizoados" polo presidente provincial
Por Oskar Viéitez |
-
A fichaxe do alcalde de Ribadumia polo PP desata unha tormenta política
Por Oskar Viéitez |
-
Ribadumia disporá de pediatra os mércores e venres no centro de saúde
Por Redacción |
-
Comezan as obras de construción dunha senda peonil na PO-300 en Ribadumia
Por Redacción |