A transformación da fachada portuaria de Portonovo custará 15 millóns de euros
Por Redacción
A conselleira do Mar, Rosa Quintana, visitou este xoves e o peirao de Portonovo para presentar os plans de transformación da fachada portuaria da localidade, que pasan por un anteproxecto no que está a traballar Portos de Galicia cun investimento estimado, compartido e a medio prazo de arredor de 15 millóns de euros.
A titular de Mar, que estivo acompañada polo alcalde de Sanxenxo, Telmo Martín e pola presidenta de Portos de Galicia, Susana Lenguas, explicou que o anteproxecto ten como punto de partida o proxecto gañador do concurso de ideas lanzado polo ente público e o Concello de Sanxenxo en xaneiro de 2022 para reordenar os distintos espazos do peirao de Portonovo.
A representante do Executivo galego detallou que a idea é executar en distintas fases as actuacións previstas polo proxecto gañador do concurso: "Novo porto de Portonovo", elixida entre seis finalistas.
O investimento estimado de 15 millóns de euros será sufragado de xeito compartido por Portos de Galicia e polos concesionarios de distintas instalacións como o aparcadoiro subterráneo planificado na zona.
O proxecto resolve a comunicación transversal entre o núcleo urbano da localidade e o bordo portuario ampliando o espazo de uso peonil próximo ás vivendas. Ademais, mantén a conexión lonxitudinal, tanto peonil como rodada, necesaria para o desenvolvemento da actividade portuaria e a accesibilidade á trama urbana.
A planificación dos espazos inclúe varias prazas pensadas para os peóns e resolve o problema de estacionamento na contorna coa creación dun aparcadoiro subterráneo con máis de 300 prazas dispoñibles nun só andar. Ademais reserva máis de 15.000 metros cadrados para áreas peonís e zonas verdes humanizadas, incluída unha gran praza central resultante de rectificar a vía para afastala das fachadas, así como unha nova praza do Porto próxima á lonxa.
USOS PORTUARIOS
A estas e outras actuacións na zona urbana engádense outras para a actividade pesqueira e usos portuarios aos que o proxecto reserva preto de 22.000 metros cadrados. Entre as actuacións a realizar está o derrubamento do edificio de departamentos de usuarios da avenida de Pontevedra para trasladar a súa actividade a un novo edificio instalado no espigón do dique de abrigo. A previsión é tamén cambiar de localización a fábrica de xeo e crear novos espazos para as escolas de vela e remo.
A conselleira salientou que "se trata dun proxecto moi ambicioso e de amplo percorrido" pois implicará trámites como a modificación da delimitación de espazos e usos portuarios (DEUP) e a elaboración dun plan especial do porto de Portonovo. Neste sentido, Rosa Quintana incidiu en que a Xunta e o Concello están a traballar da man para axilizar toda a tramitación e "iniciar canto antes a transformación da fachada marítima da localidade".
O labor que está a realizar Portos de Galicia para iniciar a contratación do anteproxecto inclúe a reordenación do tráfico sobre unha plataforma única, a construción de novos departamentos de usuarios ou a creación dun paseo sobre o dique de abrigo que dará acceso ao servizo de pasaxe. A eles engádense a dotación dunha praza pública para o lecer da cidadanía, a creación dese aparcadoiro subterráneo, a ampliación das instalacións das redeiras, a dotación de equipamentos para as escolas deportivas ou a habilitación de prazas de atraque para embarcacións culturais, entre outras actuacións.
Relacionadas:
-
Propoñen reordenar o tráfico no Paseo das Redeiras e aliviar a circulación nun dos puntos negros de Combarro
Por Redacción |
-
Compromiso político para axilizar a ordenación dos portos de Sanxenxo e Portonovo
Por Redacción |
-
Telmo Martín confía en manter a súa maioría en Sanxenxo "Nada é imposible"
Por Oskar Viéitez |
-
Unha gran praza central coroará o novo porto de Portonovo, que terá máis zona verde
Por Redacción |
-
O xurado do concurso para a remodelación do porto de Portonovo admite as seis ofertas
Por Redacción |