O Goberno central saíu ao paso este xoves á polémica xurdida nas últimas horas pola saída do buque que inspeccionará o pecio do Villa de Pitanxo en Terranova sen autorización xudicial. Fíxoo a través da ministra de Transportes, Movilidad e Axenda Urbana, Raquel Sánchez, de visita en Ferrol, e da subdelegada do Goberno en Pontevedra, Maica Larriba.

Sánchez remitiu calquera pregunta sobre a partida do buque este mércores á Comisión Permanente de Investigación de Accidentes e Incidentes Marítimos (CIAIM), organismo autónomo dependente do Ministerio de Transportes, por ser os responsables de ordenar o inicio da expedición. 

Desde o ministerio, segundo explica o seu titular, "desde o primeiro momento" mostraron a súa "colaboración total e absoluta coa Audiencia Nacional", que ten o tema xudicializado por 21 posibles delitos de homicidio por imprudencia e mantén como investigados ao patrón e a armadora do barco, Juan Padín e Pesqueiras Grupo Nores. Avanza que "vai colaborar sempre que sexa preciso coa Audiencia Nacional".

Neste proceso da baixada ao pecio, o ministerio  "participou só asumindo o custo da contratación do robot" e "cumprimentamos os requirimentos, a petición de colaboración que se fixo por parte da Audiencia Nacional".

Nun acto en Ferrol, engadiu que o seu obxectivo é que ese labor de investigación "se desenvolva con éxito e que a autoridade xudicial, as familias e as partes do procedemento consigan todas as probas que sexan precisas e axuden a esclarecer os feitos".

A subdelegada do Goberno en Pontevedra, Maica Larriba, a preguntas dos medios en Pontevedra, que "o Goberno cumpriu, montou o procedemento administrativo que permitiu que o operativo de saída do barco sexa posible" e que enviou ao xulgado toda a documentación requirida, xa o día 10 e de novo esta semana. 

Segundo explicou, autorizouse a saída do barco porque "desde o punto de vista administrativo non había ningún inconveniente" e que a Delegación do Goberno en Galicia comunicou este mércores ás familias a partida do barco.

Lembrou, ademais, que no barco van tres peritos, un deles xudicial, e que ao outro perito xudicial da Audiencia Nacional, que non se incorporou, hoxe en día poderían poñerse medios á súa disposición para que chegue ata Terranova.