Xornada de folga da CIG no sector de comercio da alimentación por falta de acordo coa patronal
Por Redacción
A xornada de folga provincial no sector do comercio de alimentación na provincia convocada polo sindicato CIG provocou o peche de diversos establecementos.
A acción dos piquetes desde primeiras horas da mañá causaba situacións nas que clientes e o persoal que estaba a traballar víanse encerrados á espera de que os manifestantes abandonasen a zona.
A folga afecta principalmente a dúas cadeas como Gadis e Froiz, xa que outros grupos de venda de alimentación contan con convenio propio.
A CIG reclama un novo convenio a tres anos no que principalmente se recollan subidas salariais cun incremento económico do 7% para este 2023 nos distintos pluses; e unha subida de soldos do 4% para cada un dos dous anos restantes. En caso de revisión salarial aplicaríase a diferenza e a esa diferenza un 0,5%.
A redución da xornada é outra das cuestións nas que se producen diferenzas coa patronal, xa que o empresariado ofrece traballar un sábado menos ao ano, mentres que a CÏG reclama unha fin de semana de calidade (librar sábado, domingo e luns) ao mes e pasar das 40 horas de traballo semanais a 39 en 2024 e a 38 en 2025.
O sindicato rexeita a subida salarial que propuxo a patronal na última negociación dun 3% en 2023; e do 2% para 2024, 2025 e 2026. Tampouco admiten que a cláusula de revisión salarial sexa limitada ao 1%, sen carácter retroactivo e sen atrasos..
Desde o sindicato convocante acusan a patronal de ameazar co despedimento ao persoal para que non se sumase á convocatoria de paro, segundo indican representantes da central nacionalista.
O piquete moveuse ao longo da mañá con momentos de tensión no Gadis da rúa Benito Corbal. A xornada tamén foi secundada en diversos establecementos da zona de Arousa. A CIG sitúa nun 70% o seguimento do paro durante este venres.
POSICIÓN DA PARTE EMPRESARIAL
Por parte dalgúns integrantes da parte empresarial distribuíuse un comunicado, que publicamos integramente:
"A CIG en Pontevedra decidiu unilateralmente que hoxe 23 de xuño de 2023 haxa folga, a pesar de que as negociacións van continuar o luns 26 de xuño.
Non só é unha folga contra a patronal, senón tamén contra os outros sindicatos. Non é un acto en defensa dos traballadores, senón un movemento completamente político.
O paradoxal deste sindicato é que di que é de aquí e con esta folga o que está a lograr é prexudicar o comercio local. Que intereses defenden? Os de Galicia non.
Este sindicato levantouse da mesa ao principio da negociación poñendo, así, de manifesto a súa falta total de interese en chegar a un acordo, o seu interese, lamentablemente e como sempre, é buscar o conflito.
O comercio local pediu mediación á administración laboral para parar isto.
Hoxe é un día crave para o comercio da alimentación que pretenden? Enriquecer a empresas de fóra e que as locais teñan perdas? Porque iso é o que vai suceder.
Curiosamente outras empresas de alimentación non galegas en Pontevedra teñen un convenio que remunera bastante menos aos seus traballadores que o comercio local ao que atacan.
Non teñen nada que dicir sobre iso? A quen e por que defenden? Que intereses descoñecemos?
Esta folga só vai prexudicar ao comercio local e aos seus traballadores, esa é a verdade. Este conflito dálle vantaxe ás empresas que non son de aquí é o que quere o sindicato que defende a identidade de Galicia? O que practica a solidariedade, que respecta o pluralismo?
Non, nin defende a Galicia, nin respecta o pluralismo, decide de forma arbitraria e unilateral en base aos seus propios intereses, e non aos dos traballadores que din defender.
Esta folga prexudica ás empresas locais, aos produtores locais (case todos pequenos) e á xente, ao veciño de Pontevedra que está cansado de conflitos, de que lle mintan, e que queren vivir en paz e poder comprar onde prefiran, non queren que lles obriguen a comprar onde os sindicatos queren.
Respectamos o dereito a folga e o papel dos sindicatos, como non podía ser doutra forma, pero o que non entendo é que non exerza o seu papel real como mediador e que antepoña os seus intereses políticos aos dos traballadores e a sociedade galega. Porque, o que hoxe queda claro é que este sindicato quere unha sociedade local máis pobre e dependente."
Relacionadas:
-
Suspenden os dous días de folga previstos para esta semana no comercio de alimentación
Por Anxo Lourido |
-
A CIG convoca folga no comercio de alimentación o 12 e 13 de xullo
Por Anxo Lourido |
-
O 13 de xuño, día clave na negociación do convenio colectivo no comercio de alimentación
Por Juan Manuel García Tajes & Anxo Lourido |
-
'Paremos o saqueo', lema da CIG para a manifestación do 1º de maio reivindicando a acción sindical de "confrontación"
Por Mónica Patxot & Anxo Lourido |