46 bolsas da Deputación irán destinadas a estudantes de FP para realizar prácticas no estranxeiro
Por Anxo Lourido
Luís López, presidente da Deputación de Pontevedra, anunciaba este venres a concesión de 46 bolsas para estudantes titulados de formación profesional de centros da provincia. Estas bolsas enfócanse na realización de prácticas laborais no estranxeiro.
A institución provincial destinará 350.000 euros para mellorar a formación e as posibilidades de emprego cubrindo gastos de viaxe, manutención, aloxamento e transporte no país de destino por un período entre tres e oito meses.
Durante ese proceso, as persoas bolseiras mellorarán competencias profesionais, adquirirán experiencia laboral e terán a posibilidade de mellorar o seu dominio doutra lingua. "Confiamos en que ese talento retorne logo á provincia e que poida brillar aquí, en casa", expuxo López.
As persoas beneficiadas nesta quinta edición son 45 estudantes e un docente que pertencen a 16 institutos da provincia. Os países escollidos son Italia, Portugal, Francia, Malta, Irlanda e Finlandia.