O alcalde de Cambados xestiona coa congregación relixiosa demorar os prazos de venda do asilo
Por Oskar Viéitez
O Concello de Cambados está xestionando coa congregación das Hermanitas de los Ancianos Desamparados, propietaria do asilo, a posibilidade de demorar os prazos de venda do inmoble para poder ter maior marxe de manobra na busca de solucións ao problema que suporía o seu peche.
Para tal fin, o alcalde Samuel Lago manterá conversas a vindeira semana con representantes da orde en Valencia para, ademáis, tentar reducir o prezo de venda establecido.
O obxectivo do goberno local é que o Pazo de Montesacro quede en mans públicas e que siga destinado a residencia de maiores.
Dende que se confirmou públicamente a situación, o alcalde Samuel Lago mantivo contactos cos presidentes da Xunta e da Deputación, co grupo inmobiliario que ten o pazo de Montesacro en venda, coa congregación relixiosa en Valencia e coa representación da parroquia en Cambados.
"Temos xa contactado coa congregación coa que agardamos obter o compromiso de que se demore a venda e nos dea maior marxe de manobra para ver como se pode articular a continuidade do asilo en coparticipación con outras administracións", avanza o alcalde.
Neste sentido, Samuel Lago amósase moi crítico coa postura que ven mantendo en todo este proceso a voceira do PP Sabela Fole "que ata de agora non se dedicou máis que a poñer paus na roda e a defender os intereses do PP".
Samuel Lago considera que aínda que fora posible a compra do inmoble por parte do Concello, "ese crédito nos abocaría a prescindir de inversións en obras e actuacións durante un longo período de tempo".
Pero é que, ademáis, "o Concello ten un límite de gasto, en base ás normas fiscais, que impide endebedarnos no importe millonario da adquisición do pazo, de xeito que ainda que conseguíramos o préstamo bancario, legalmente non podemos executar tal operación", lembra o alcalde.
Asimesmo, o rexedor lembra que existe un problema de competencias e "aínda que o Concello comprara o inmoble non pode destinalo a fins asistenciais de residencia de maiores, que é o obxetivo prioritario para este goberno".
Ante esta situación, Lago entende que "o máis lóxico, sensato e razoable é que en todo este proceso se implique unha administración que tamén teña as competencias para xestionar o asilo" como é a Xunta de Galicia "pero xa comprobamos as reticencias expresadas polo presidente da Xunta despóis de que eu personalmente abordara con el este tema", finaliza o rexedor.
Relacionadas:
-
Cambados rexeita empregar fondos do +Provincia da Deputación para adquirir o Pazo de Montesacro
Por Oskar Viéitez |
-
Enfado do alcalde de Cambados coa Xunta polo asilo
Por Oskar Viéitez |
-
O BNG quere que a Xunta compre o Pazo de Montesacro para convertelo nunha residencia pública de maiores
Por Redacción |
-
Cambados tentará conseguir o apoio da Deputación e da Xunta para comprar o asilo
Por Oskar Viéitez |