Representantes de Brasil e Italia visitan 'a cidade dos 15 minutos' dentro do proxecto 'AcessoCidades'
Por Oskar Viéitez
O alcalde de Pontevedra, Miguel Anxo Fernández Lores e a tenente de alcalde, Eva Villaverde, recibiron este luns a unha nova delegación estranxeira interesada en coñecer as políticas públicas de mobilidade urbana da Boa Vila.
Esta delegación estaba formada por representantes de cidades italianas e brasileiras interesadas no intercambio de experiencias e boas prácticas entre países para fomentar unha mobilidade sostible a partir de criterios de igualdade.
A visita enmárcase no Proxecto 'AcessoCidades: cidades máis accesibles e conectadas', unha iniciativa do Fronte Nacional de Prefeitos (Brasil), en colaboración coa Confederación de Fondos de Cooperación e Solidariedad (España) e a Associazione Nazionale Comuni Italiani (Italia), con cofinanciamento da Unión Europea.
Despois da recepción co alcalde, o director xeral de Seguridade do Concello de Pontevedra, Daniel Macenlle, realizou unha presentación do modelo de cidade e unha visita guiada pola mesma.
Os representantes italianos e brasileiros tiñan especial interese en coñecer o 'metrominuto', con percorridos a pé que vertebran o centro urbano pontevedrés e permiten situarse en calquera punto da cidade en quince minutos.
Ademais da cidade do Lérez esta delegación ten previsto visitar Vigo, Bilbao, Barcelona, e Santa Coloma de Gramenet.
A delegación debaterá sobre aspectos como a sustentabilidade financeira do transporte e sobre peaxes urbanas ou impostos a combustibles.
Tamén buscan coñecer experiencias prácticas sobre os modelos de operadoras, a xestión do transporte público nas zonas metropolitanas, a regulación dos servizos de transporte individual a través de aplicacións, o fomento da mobilidade a pé ou en bicicleta ou as facilidades para que os colectivos vulnerables teñan acceso a toda esta rede de servizos, entre outras cuestións.
Relacionadas:
-
Pontevedra acollerá en 2025 un congreso sobre desprazamento activo, saudable e sostible
Por Alejandro Espiño |
-
Investigadores xaponeses percorren Pontevedra para coñecer a súa transformación urbana
Por Alejandro Espiño |
-
Irlanda escolle Pontevedra como caso de estudo e análise
Por Redacción |
-
Así ve a cidade de Pontevedra a revista estadounidense Fast Company
Por Alejandro Espiño |
-
Miguel Anxo Fernández Lores: "Que Pontevedra sexa a capital mundial do tríatlon non é casualidade. Hai moito traballo detrás"
Por Alejandro Espiño & Mónica Patxot |
-
O Goberno alemán pregunta ao Bürgermeister Lores sobre a construción de cidades pensadas para as persoas
Por Oskar Viéitez |