Luis Quiles naceu en Toledo e formouse en Madrid, pero desde fai tres anos considérase pontevedrés de adopción. Chegou á cidade por amor e quedou como un reto persoal. Creou unha empresa, Amodiño, dedicada a servizos de márketing, e agora asumiu en primeira persoa o desafío de impulsar o Círculo Joven do Círculo de Empresarios de Galicia. 

Aínda que a sede do Circulo está en Vigo, como herdeiro do antigo Club Financeiro, nesta nova etapa, como coordinador do Círculo Joven, busca abrir a entidade a toda Galicia e, en especial, a Pontevedra, unha cidade da que asegura que "moitas" posibilidades de futuro, pero non acaba de crer nelas nin de explotalas. 

"Son pontevedrés de adopción, quero promocionar Pontevedra". É toda unha declaración de intencións. E acompáñaa con propostas xa en firme co convencemento de que "se tivese un plan de cidade de aquí a 15 anos, sería moi potente", pois Vigo vai crecer e pode facelo cara ao Porriño ou cara a Pontevedra. O reto é que o faga cara á capital. 

Ese potencial de crecemento que lle ve -"claro que ten posibilidades. Ten moitas posibilidades"- enfócao cara ao ámbito creativo, como cidade que alberga as únicas facultades de Belas Artes e de Publicidade de Galicia e proxectos xa en marcha como o Campus Crea da Universidade de Vigo.

A título persoal, esa confianza no potencial de cidade levouno a presentar a uns premios un proxecto para "converter Pontevedra nun polo creativo". Parte da base de que A Coruña é un polo de deseño, Santiago é unha cidade administrativa e Vigo é un polo empresarial. A Pontevedra quédalle ese oco máis creativo e propón explotalo.

"Se tivese un plan de cidade de aquí a 15 anos, sería moi potente"

O seu obxectivo: evitar que o alumnado que se forma nese ámbito en Pontevedra acabe marchándose a Madrid a estudar un máster ou a formarse nunha escola creativa. "Aquí pódeselle dar iso. Ten moitísimas posibilidades e é unha facultade da que saíron perfilazos incribles, pero non se potencia. Eu non entendo como non se potencia iso", sinala. 

A súa proposta é sentar as bases dunha pequena escola creativa e, como primeira acción, aposta por poñer en marcha unha especie de hackathon, un encontro para fomentar o pensamento creativo.

A partir de aí, aspira a establecer colaboración de empresas privadas e institucións e que "nun medio- longo prazo facer que Pontevedra empece a construír esa institución", un polo creativo dentro de Galicia, ao estilo da escola de creativos Brother Madrid. "Ese tipo de escola ten que habela aquí, e xente que vaia a asistir hai porque hai moitos que van a Madrid e, en lugar diso, perfectamente poderían estar un ano máis en Pontevedra nesa escola creativa, non?", sostén. 

Con iniciativas como esa, considera que Pontevedra podería crecer dunha forma "incrible" e, como localidade entre o polo de deseño da Coruña e o industrial de Vigo, converterse nun referente a nivel creativo e que grandes axencias do sector se asentasen aquí. "Non temos que estar onde está a empresa, se o facemos ben, a empresa pode cambiar e vir a nós", está convencido.

Ademais, sinala o potencial que xa demostra Galicia a nivel audiovisual e publicitario. Sinala que tres das cinco ultimas campañas de Nadal de Loterías do Estado rodeáronse en Galicia e que "iso é porque hai creatividade boa, é porque hai equipos bos". Agora só fai falta que a cidade de Pontevedra "atráiao e que o reteña". 

"Pontevedra a min encántame que sexa peonil, pero hai que pensar que de aquí a 20 anos ten que ter peóns para que anden polas rúas"

Este mozo emprendedor valora que "Pontevedra a min encántame que sexa peonil, que o modelo de cidade sexa peonalizar, pero, claro, hai que pensar que de aquí a 20 anos Pontevedra ten que ter peóns para que anden polas rúas porque se se converte nunha fábrica de funcionarios e os que saen da Facultade de Comunicación ou Fisioterapia saen de Pontevedra, quen vai quedar para andar polas rúas peonís?".

Desde o Círculo Joven do Círculo de Empresarios de Galicia tentarán contribuír a que iso se consiga e nestes próximos meses sacarán as actividades de Vigo. Pretenden explotar a sede que teñen na cidade olívica pensando na xente nova con accións como un espazo de coworking para os socios de Círculo que permitirán aos emprendedores novos traballar un lugar no centro da cidade, con ximnasio, aparcamento a metade de prezo dun posto de coworking noutro lugar.

Pero iso non evitará que saian e monten eventos dinámicos fóra desa cidade. O Círculo Joven nace con vocación de organizar eventos "máis participativos", pois "somos unha xeración diferente, temos formas de enfocar o emprendemento diferentes, non é todo tan encorsetado" e este novo proxecto quere sacarse de encima a imaxe de institución anticuada e potenciar a posibilidades do Círculo de Empresarios de Galicia para que os emprendedores entren en contacto co tecido empresarial galego e explotar as opcións de negocio.  

"Somos unha xeración diferente, temos formas de enfocar o emprendemento diferentes, non é todo tan encorsetado" 

Este Círculo Joven está pensado para chegar a diferentes perfís. Por unha banda, aos fillos e netos dos socios do Círculo de Empresarios, pero tamén ao exterior, a mozos que está a terminar a carreira, aqueles que están a empezar en emprendemento con 30 anos, ao que xa teñen 35-40 e xa están a desenvolver o seu proxecto en solitario ou a persoas están a traballar nunha empresa e queren abrir a súa rede de contactos.

Luis Quiles entrou no Círculo de Empresarios da man da consultora Lucía Gefaell, á que chama a súa "mentora", viu que tiña posibilidades e propuxo crear este Círculo Joven en paralelo á súa empresa particular. 

Amodiño naceu cando chegou a Pontevedra "por amor". Logo, "saíu regulero e montei unha empresa", confesa e así leva loitando tres anos, nun sector afastado das súas orixes profesionais no equipo de comunicación de Isabel Diaz Ayuso no PP de Madrid.

Á súa empresa bautizouna Amodiño por esa chiscadela a Galicia e porque "resume moi ben o que eu considero que temos que facer". Á hora de traballar en Publicidade, cre que "as cousas van amodiño, a xente méteche moita présa e non, hai que ir aos poucos, ter unha estratexia que é pausada e sacalo adiante". 

Para a súa implantación en Pontevedra, o Círculo Joven ten moito traballo pendente, pois actualmente o Círculo de Empresarios "non ten moita implantación", pero confía en que o proxecto chegue a bo porto unha vez que os emprendedores se dean conta de que forma "pódeche abrir portas o Círculo. É unha moi boa opción se sabes explotalo. Podes sacar moito negocio do Círculo de Empresarios, pero tes que ser unha persoa que teña un pouco de sangue nas veas".

"Hai moi boa aceptación, parece que a xente estaba a desexar que alguén dixese: imos facer algo para os mozos"

"O Circulo está para iso, para facer negocio" e da relación interxeracional poden saír proxectos interesantes, pois cre un erro esas entidades sectoriais que só relacionan a empresarios ou emprendedores cun mesmo perfil, pois non abre novas portas.

De momento, xa o experimentou en primeira persoa, pois desde que se presentou o Círculo Joven non parou de recibir correos electrónicos de persoas interesadas e leva unha axenda completísima. "Iso é bo porque hai moi boa aceptación da proposta, parece que a xente estaba tamén desexando que alguén dixese: imos facer algo para os mozos", conclúe.

En Pontevedra, por exemplo, ve que "hai moitos emprendedor, si, pero eu creo que tamén queren ter un respaldo ou queren ter a alguén que lles anime aínda a seguir adiante". Necesitan a alguén que lles axude, asesore e dea consellos.