A vida de Adrián Cons e Sandra Filgueira continúa chea de sobresaltos. Tras denunciar, hai un par de semanas, o trato que estaría a recibir o seu fillo de 3 anos por parte dunha coidadora de autobús, espertaron cos seus coches completamente calcinados.

A Garda Civil xa investiga o suceso que, segundo os primeiros indicios, sería provocado. Restos de líquido inflamable no motor de ambos os coches así o indica.

Os afectados explicaron a PontevedraViva que todo sucedeu ao redor das cinco desta madrugada.

"As cadelas empezaron a ladrar e a miña muller díxome que había alguén fóra", sostivo Adrián, que ao abrir a porta da súa casa viu como os seus dous coches estaban a arder.

"Chamamos aos veciños e apagamos o lume con mangueiras", subliña, tras o cal chamaron á Garda Civil para presentar a correspondente denuncia.

Os axentes acudiron ata a vivenda familiar, situada en Vilanova de Tenorio, para investigar estes feitos, que a parella sospeita que están relacionados coa situación que denunciaron.

Non é a primeira vez que sofren un incidente relacionado con eses feitos porque, segundo detalla Sandra, "tentan provocarnos continuamente pero nós non lles facemos caso".

Todo o sucedido achegouse nunha denuncia sobre a que xa traballa a Garda Civil, que investiga o ocorrido para tratar de identificar o autor deste atentado.