"Asolagados", un documental que rescata a vida dos pobos que se tragou o Miño
Por Redacción
A Casa das Campás acolle este venres 28 de febreiro, a partir das 19.00 horas, a presentación do documental Asolagados, dirixido por David Vázquez. A proxección está organizada pola Asociación Cultural Maio Longo e o Concello de Pontevedra.
Asolagados é un documental sobre os pobos de Abideira, Porto, Castro Candaz, Santa Marta, Pincelo, Ponte Fortes, A Samugueira, San Paio, Mourulle, Portomeñe, A Hermida, Ribó, anegados polo encoro de Belesar no 1963.
As imaxes e sons amósanos a Ribeira Sacra e o río Miño; os restos das casas, das adegas, das árbores e especialmente, as voces dos veciños, especialmente das dez testemuñas que viviron nestes lugares antes da construción do salto e que se viron obrigadas a deixalo todo.
No documental traballaron David Vázquez (dirección e montaxe), Cristina López (produción e promoción), Humberto Novoa (cámara), Luis A. García Linares (son), Afonso Eiré (guión), Chechu Carballido e 'A Quenlla' (música orixinal), Fernando Morán (locución), Lomarti (deseño de cartaces), Alba Sánchez (deseño gráfico e créditos), Mercedes Vázquez e Begoña Sánchez (colaboración en reproducción).