La Guardia completa o cartel da Festa do Mar de Combarro
Por Redacción
A Concellaría de Turismo de Poio está a ultimar o programa da próxima Festa do Mar, que celebrará a súa XV edición entre os días 19 e 23 de agosto.
A falta de pechar outras actividades do programa, o Concello xa ten confirmadas todas as actuacións musicais que terán lugar durante cada unha das noites da festa que, como ven sendo habitual, se celebrará na vila de Combarro.
Xa estaban confirmadas as actuacións de Carlos Baute (20 de agosto), o Festival Armadiña Rock (21 de agosto) -que terá como cabeza de cartel a Os Diplomáticos de Monte Alto-, o grupo América (22 de agosto) e da banda canaria The Boys Machine (23 de agosto).
A todos eles súmase agora o concerto que protagonizará o grupo La Guardia na noite do 19 de agosto.
Ademais dos concertos, o Concello de Poio seguirá a apostar por unha festa que ten como pratos fortes a gastronomía ou a tradición mariñeira representada coa Concentración de Embarcacións Tradicionais que este ano celebrará a súa XX edición.