O cineasta francés Jean-Pierre Melville, protagonista do Cineclube Pontevedra en setembro
Por Redacción
Jean-Pierre Melville, un dos grandes cineastas franceses, será o protagonista das proxeccións que o Cineclube Pontevedra organizou para este mes de setembro.
O director, do que se cumpriron o pasado ano 100 anos do seu nacemento, é o responsable das tres películas que se verán no Teatro Principal os martes ás 20.30 horas, nun único pase e en versión orixinal subtitulada.
Así, a oferta estará composta polas películas Léon Morin, prêtre (martes 11), ambientada durante a ocupación francesa polos nazis na Segunda Guerra Mundial; Le doulos (martes 18), que presenta a historia dun ladrón que ten como socio, sen sabelo, a un confidente da policía; e Le cercle rouge (martes 25), na que un refinado ladrón de guante branco sae do cárcere e se asocia cun asasino para un novo atraco.
Jean-Pierre Melville (nacido Jean-Pierre Grumbach) mudou o seu apelido por admiración cara a un dos grandes escritores que marcaron a súa adolescencia: Herman Melville.
Con só trece longametraxes ás súas costas, Melville creou un personalísimo universo, marcado pola experiencia da II Guerra Mundial e pola súa participación na Resistencia, e converteuse no máximo expoñente do cinema polar francés e do drama moral europeo, rodeado sempre dos seus actores fetiche: Jean-Paul Belmondo, Alain Delon e Lino Ventura.