Alberto San Juan encarna este sábado a Lorca en Pontevedra nun espectáculo con música en directo
Por Redacción
Lorca viviu en Nova York desde xuño do 1929 ata febreiro de 1930. Logo viaxou a Cuba, onde pasou tres meses e, finalmente, regresou a España cos poemas do libro Poeta en Nova York na súa maleta. Ese é o punto de partida da obra Nueva York en un poeta.
Este espectáculo, protagonizado polo actor Alberto San Juan, marca o inicio formal da programación cultural que Pontevedra deseñou para o próximos seis meses. A representación será este sábado 21 de xaneiro, ás 20:30 horas, no Pazo da Cultura.
Nueva York en un poeta mostra, en concreto, o encontro de Lorca co público na Residencia de Señoritas de Madrid, onde se escoitaron por primeira vez eses poemas.
A obra comeza cun preludio musical, interpretado en directo por La Banda (Claudio de Casas, guitarra; Pablo Navarro, contrabaixo; Gabriel Marijuán, batería; Miguel Malla, saxo e clarinete) e composto por fragmentos das pezas de jazz que Lorca descubriu nos clubs de Nova York en 1929.
A continuación, a voz de Ian Gibson introduce a conferencia e Federico, interpretado por Alberto San Juan, aparece en escena. Da súa man, os espectadores poderán viaxar durante unha hora desde Granada a Nova York e A Habana.
As entradas para asistir a Nueva York en un poeta están á venda, a un prezo de 12 euros, na plataforma Ataquilla.com.