Golpe de autoridade de Javi Gómez Noya, que logra en Chicago a súa cuarta vitoria nas Series Mundiais
Por Alejandro Espiño
Que Javi Gómez Noya está nun momento de forma extraordinario está fóra de toda dúbida. Pero que gañe unha proba das Series Mundiais con tanta autoridade como fixo en Chicago é algo que está ao alcance de moi poucos. O triatleta ferrolán afincado en Pontevedra deu un paso importante no seu obxectivo de revalidar o título cun claro triunfo na cidade estadounidense. ÿ a súa cuarta vitoria da tempada.
Na súa estrea no circuíto das Series Mundiais, Chicago brindou aos deportistas e espectadores un escenario de luxo, comezando coas dúas voltas iniciais por un dos símbolos da cidade da costa sueste estadounidense, o lago Michigan. Completados os 1,5 kilómetros do sector, Gómez Noya saía destacado da auga, a escasos segundos dos líderes, que guiados polo estadounidense Ben Kanute se encamiñaban cara á primeira transición.
Xa no sector de ciclismo, no que se deron oito voltas polas inmediacións da cidade, Javi Gómez Noya e outros dous españois, Mario Mola e Fernando Alarza, mantivéronse no grupo de cabeza durante os 40 quilómetros dun percorrido moi técnico e que incorporaba numerosos xiros que causaron un gran desgaste aos triatletas. Non foi ata a quinta das oito voltas cando callou unha fuga do neozelandés Tom Davison e o australiano Cameron Good, que chegaron a adquirir unha renda de 45 segundos á entrada da segunda transición.
Pero ambos os dous pagaron o esforzo realizado e nada máis empezar a carreira a pé de dez quilómetros, o pelotón liderado polo trío español empezou a recortar distancias. Un grupo de seis triatletas con Gómez Noya, Mola e Alarza, xunto co portugués Joao Pereira, o británico Adam Bowden e o ruso Alexander Bryukhankov, lograba enlazar con eles nos primeiros instantes da carreira, tras completar o segmento ciclista no grupo perseguidor.
Ao remate da primeira volta lograban alcanzalos e superalos, e pouco despois Mario Mola, Javi Gómez Noya e o luso Pereira zafábanse do resto para emprender a loita polo podio. Os españois aumentarían o ritmo para deixar atrás o triatleta portugués. Cando parecía que ambos os dous se disputarían o triunfo nun axustado final, o ferrolán cambiaba de ritmo e conseguía deixar atrás a Mola, que se viu superado polo portugués nos últimos instantes.
Javi Gómez Noya cruzou a liña de meta en solitario, logrando un tempo de 1:47:21. Foi oito segundos máis rápido que Joao Pereira. A terceira praza foi para Mario Mola, que rematou a 19 segundos do ferrolán. A brillante actuación española completouse coa quinta praza de Fernando Alarza, que como el adestra no Centro de Tecnificación Deportiva de Pontevedra, que entrou a 44 segundos do gañador.
Tras esta quinta proba das Series Mundiais, Gómez Noya amplía a súa vantaxe na clasificación xeral ao sumar 3.742 puntos. Mario Mola ocupa a segunda praza con 3.322 puntos e terceiro é Jonathan Brownlee con 2.652 puntos. O inglés, ao igual que o seu irmán Alistair, non competiron en Chicago.
A próxima cita celebrarase entre o 12 e 13 de xullo na localidade xermana de Hamburgo.
Relacionadas:
-
Gómez Noya retírase en Estocolmo pero mantense líder a falta da Gran Final
Por Redacción |
-
Javi Gómez Noya, cuarto en Hamburgo, máis cerca de revalidar o título das Series Mundiais de tríatlon
Por Redacción |
-
Javi Gómez Noya, sexto en Londres, mantén o liderado das Series Mundiais de tríatlon
Por Redacción |
-
Gómez Noya imponse en Yokohama e suma o seu terceiro triunfo consecutivo nas Series Mundiais
Por Diego Espiño |