O Running Rías Baixas chega a Moraña o 20 de xullo coa Carreira popular do Carneiro ao Espeto
Por Redacción
O Running Rías Baixas chega á súa segunda cita. Trala estrea que supuxo a Eurocidade 10 de Tui, que uniu á localidade galega coa cidade veciña de Valença, Moraña acollerá o vindeiro 20 de xullo a Carreira popular do Carneiro ao Espeto, que coincidirá coa popular festa gastronómica. A proba foi presentada este mércores pola alcaldesa da vila, Luisa Piñeiro, e a responsable de Deportes na Deputación de Pontevedra, Begoña Estévez
No acto participaron tamén os atletas Anxo Graña, Juan Romero, Solange Pereira (madriña das probas) e Víctor Riobó que colaboran na organización da proba, así como representantes do Club de Atletismo de Moraña. A carreira vai dirixida a persoas con hábitos deportivos e ten un percorrido de 8 quilómetros.
Begoña Estévez explicou que este evento deportivo forma parte do programa da Deputación de Pontevedra denominado Running Rías Baixas, que se completa cunha terceira carreira, o XLI Trofeo Pedestrismo Concello de Cangas o día 7 de decembro, cunha proba de 10 quilómetros que chegará ata Aldán.
A iniciativa enmarcase na creación dun circuíto de carreiras populares no que a clasificación non se fai de forma individual para cada unha, senón que se establece un sistema no que se terá en conta a participación e o resultado das tres probas. Será o mesmo formato que se usa para as clasificacións xerais dunha volta ciclista, sumando os tempos de cada unha das probas.
A inscrición para participar nesta carreira popular é gratuita e poderá facerse a través da web da Deputación ou no propio concello de Moraña.
Fóra deste circuito, aínda que estaba integrado nel nun primeiro momento, queda o medio maratón entre O Grove e Cambados, percorrendo a costa da ría de Arousa. Impulsada tamén pola Deputación, celebrarase previsiblemente a finais de setembro, pero de forma individual ás outras tres carreiras.
Relacionadas:
-
Rafael Fuentes (Sociedad Gimnástica) non pode con Elías Domínguez na carreira do Carneiro ao Espeto
Por Redacción |
-
O medio maratón entre O Grove e Cambados cae do Tour Running Rías Baixas
Por Diego Espiño |
-
Un medio maratón unirá Cambados e O Grove na primeira edición do circuíto 'Running Rías Baixas'
Por Redacción |