Punto que vale ouro para o Teucro nun emocionante partido ante o Ciudad Encantada (21-21)
Por Diego Espiño & Diego Torrado
Ao Condes de Albarei Teucro, cando xoga no Pavillón Municipal dos Deportes, convén rematalo se se ten a oportunidade. Non o fixo o Ciudad Encantada, que a falta de 12 minutos dominaba por 4 goles (15-19) e terminouno pagando cun empate que a piques estivo de converterse en triunfo local.
Semella xusta a igualada nun encontro emocionante, disputado ata o extremo e ata polémico, cunha discutida acción final nunha contra de Edu Moledo cortada bruscamente por Pablo Vainstein que podía decantar o choque en favor dos locais. En todo caso o que foi é un exercicio de constancia e supervivencia dos azuis, que durante gran parte do partido foron a remolque no marcador pero que seguiron remando sen descanso axudados polo alento dos seus afeccionados.
As defensas impuxéronse no inicio do encontro, cun Ciudad Encantada forte no 6-0 especialmente na zona central que obrigaba aos pontevedreses a realizar lanzamentos forzados desde a primeira liña. Tamén se aplicaba o Teucro en defensa, e só Leo Maciel en portería empezaba a marcar diferenzas. O gardameta dos conquenses desesperou durante todo o partido aos catro extremos teucristas, aos que sacou inumerables accións en posición clara.
Tamén Santana aparecía na portería local, pero non impedía que a renda subise ata os tres tantos (6-9, minuto 21). Resistíanse os de Quique Domínguez, pero os visitantes estenderon o seu dominio ata o descanso (8-10).
O paso por vestiarios sentou ben ao Teucro, que nun inicio fulgurante e con goles de Dani Hernández, Balázquez e De Castro lograban igualar o marcador (11-11) nun dicir amén. Con todo os fallos en ataque aproveitábaos o Ciudad Encantada, que non afrouxaba e volvía tomar vantaxe.
O choque parecía escaparse ao pasar o ecuador do segundo tempo para desesperación local (15-19). Así o viu o público, que elevou a súa presión dando un impulso extra aos seus. Pedíanlles que non baixasen os brazos e conseguírono. Carlos García e Balázquez reducían a desvantaxe á metade e nin unha exclusión do capitán teucrista freaba a reacción. Os de Quique Domínguez subían a presión defensiva, gañaban a inferioridade e cun sete metros forzado por Borja Méndez e transformado por Carlos García conseguían empatar (20-20) a falta de menos de cinco minutos.
Agora si o Municipal era unha caldeira a piques de estoupar. Aos dous equipos custáballes atopar situacións de lanzamento e o tempo seguía correndo. Así, xusto dous minutos para a conclusión Borja Méndez facía estalar á parroquia local nunha gran acción individual baixo ameaza de pasivo para poñer por diante ao Condes de Albarei, o que non sucedía desde o 1-0.
Empataba despois o Ciudad Encantada cun sete metros trasnformado por Dutra. Restaban só 60 segundos e a posesión era local. Todo por decidir e moito por pasar, porque os azuis perdían o balón e daban a que parecía última opción aos visitantes. Foi entón cando apareceu Santana para deter o balón e sacar unha rápida contra para Edu Moledo con escasos segundos de tempo que Pablo Vainteins encargouse de parar 'polo civil ou o criminal'. Sete metros segundo a regulamentación, pero non o entenderon así os colexiados que nin sequera indicaron golpe franco nunha acción que podía cambiar o signo do partido e que provocou as protestas de xogadores e afección.
A pesar diso o Teucro pode darse por satisfeito co punto logrado ante un dos equipos revelación da tempada e que lle mantén nunha cómoda posición na clasificación de Asobal con 11 puntos, 5 por encima do descenso.
SD TEUCRO (21): Santana, Borja Méndez (3), Juan Quintas (1), Rial, De Castro (1), Edu Moledo (2), Gehrhardt -siete inicial- Balázquez (7) Iván Fernández, Samu Gómez (1), Carlos García (2, 1p), Dani Hernández (3, 1p), Ángel Iglesias (1), Moyano, Lloria, Samuel Pereiro.
CIUDAD ENCANTADA (21): Leo Maciel, Dutra (8, 3p), Vainstein (4, 1p), Doldan (2), Xavi Castro , Sergio López, Perovic (3) -siete inicial- David Mendoza , Alves (2), Marc Canyigueral, Hugo López (1), Nolasco, Rafael López (1), Fernández Galán, Kilian Ramírez.
Árbitros: Fernández Pérez e Iniesta Castillo (Valencia). Excluíron a Juan Quintas (2), Carlos García e Gehrhardt (2) no Teucro e a Marc Canyigueral, Leo Maciel e Alves no Ciudad Encantada.
Marcador cada cinco minutos: 2-2, 4-4, 4-5, 6-7, 8-9, 8-10, descanso, 12-13, 13-15, 15-18, 16-19, 19-20, 21-21.
Incidencias: Partido da Liga Asobal disputado no Pavillón Municipal dos Deportes de Pontevedra ante 990 espectadores. Gardouse un minuto de silencio polo falecemento de José Ludena, xerente do Ademar de León.
Relacionadas:
-
Teucro-Barcelona no Municipal: Misión imposible?
Por Diego Espiño |
-
O Teucro teme que Rial padeza unha grave lesión de xeonllo
Por Diego Espiño |
-
Non pode Condes de Albarei Teucro cun Bidasoa en alza (32-26)
Por Redacción |
-
Irún, nova cita no maratón de partidos do Teucro
Por Diego Espiño |
-
Festivo de balonmán para o Teucro cun partido "muy importante" ante o Ciudad Encantada
Por Diego Espiño |
-
Cangas e Condes de Albarei Teucro converten o empate nun clásico dos derbis (26-26)
Por Ramiro Espiño |
-
Johnny Medina, a mellor 'fichaxe' de inverno para o Teucro
Por Diego Espiño |
-
Santana e unha gran defensa elevan ao Teucro ante o Atlético Valladolid (28-22)
Por Diego Espiño & Diego Torrado |