A medio mes para celebrar o fin de ano, a 'Rara, pero San Silvestre' de Pontevedra, a versión readaptada aos tempos de pandemia para manter o espírito de promoción do deporte e a vida saudable da popular proba deportiva, abriu o seu período de celebración. 

Para lembralo, varios representantes do goberno local como o concelleiro de Deportes, Tino Fernández, e os seus compañeiros de corporación Yoya Blanco, Iván Puentes e Marcos Rey calzaron este martes as zapatillas deportivas para completar un dos 10 itinerarios previstos na San Silvestre.

"Máis que nunca, trátase dunha San Silvestre pensada para todo o mundo e na que os que non estamos tan en forma, como é o meu caso, tamén podemos achegar o noso grao de area e colaborar co Banco de Alimentos", sinalou Tino Fernández.

Para a xornada inaugural optaron por percorrer a ruta 'Entrepontes', unha das máis alcanzables ao contar con 1.000 metros de recorrido entre as pontes do Burgo e o das Correntes.

Ata o 15 de xaneiro, os que queiran participar na 'Rara, pero San Silvestre' poderán facelo inscribíndose na web da Sociedad Gimnástica, para despois rexistrar a súa actividade nos diferentes itinerarios previstos:

1. Illa das Esculturas-Avenida de Bos Aires (4.600 metros)
2. A Xunqueira de Alba (3.800 metros). 
3. Puente do Burgo-Ponte das Correntes (1.000 metros) 
4. Miradoiro da avenida de Marín-Ponte dos Tirantes (5.000 metros) 
5. Alameda-As Palmeiras (1.200 metros)
6. Senda do Gafos (8.400 metros)
7. O Gorgullón-Os Gafos (1.600 metros)
8. Parque do Miradoiro (1.400 metros)
9. Senda do Lérez (8.000 metros)
10. Pontillón do Castro (3.360 metros)